Rossiyadagi o‘zbekistonlik mehnat migrantlariga til va kasb o‘rgatish choralari ko‘riladi - Prezident qarori

Prezident Shavkat Mirziyoyev kambag‘al va ishsiz fuqarolarni kasbga o‘rgatishga oid qaror imzoladi.

Qarorga asosan:

• uch oy muddatda O‘zbekiston fuqarolari ko‘pchilikni tashkil etuvchi Rossiyaning Moskva, Sankt-Peterburg, Qozon, Yekaterinburg, Novosibirsk shaharlarida va boshqa hududlarida davlat va nodavlat ta'lim muassasalari bilan muzokara olib borib, mazkur hududlarda ishlayotgan O‘zbekiston fuqarolarini kasb-hunarga va rus tiliga ayniqsa kechki payt (ish vaqtidan keyin) o‘qitishni tashkil etish; o‘qitish uchun joy, o‘quv qo‘llanmasi va o‘quv qurollari bilan ta'minlash bo‘yicha kelishuvlarga erishish choralari ko‘riladi;
• ikki oy muddatda Rossiya xalqlar do‘stligi universiteti (RUDN), «Molodyye professionaly (WorldSkills Russia)» ittifoqi hamda boshqa ta'lim va kasbiy malakani baholash muassasalari bilan O‘zbekiston fuqarolarining Rossiya Federatsiyasida kasb-hunarga va rus tiliga o‘qitilishini tashkil etishda hamkorlik o‘rnatish choralari ko‘riladi;
• bir oy muddatda xorijda mehnat faoliyatini olib borayotgan O‘zbekiston fuqarolarini huquqiy, ijtimoiy va madaniy-gumanitar qo‘llab-quvvatlash, ularning mehnat faoliyati uchun qulay shart-sharoitlar yaratish bo‘yicha takliflar ishlab chiqilib, Vazirlar Mahkamasiga kiritiladi.

Shuningdek, uyushgan mehnat migratsiyasi yo‘li bo‘yicha xorijga ishlash uchun ketayotgan va «labor-migration» dasturiy majmuasida ro‘yxatga olingan fuqarolarni ketishidan oldin tadbirkorlik ko‘nikmalari, xorijiy tillar va kasb-hunarga tayyorlash choralari ko‘riladi.

Bunda, davlat yoki nodavlat kasb-hunarga o‘qitish muassasalarida, ishlab chiqarishning o‘zida o‘qitish uchun tashkilot va «usta-shogird» maktablariga har bir ta'lim oluvchi uchun bir oyda BHMning 4 baravaridan ortiq bo‘lmagan miqdorda grantlar ajratiladi.