Криштиану Роналду Португалия миллий жамоасида яна ўйнаши мумкин – бу мавзуга ҳали нуқта қўйилмаган. Форвард фаолиятидаги 1000-голни айнан миллий жамоада уришни хоҳлайди.
Жезуш у билан ҳамкорлик қилишга тайёр
Роналдусиз ўйнашда давом этаётган Португалия Норвегияни мағлуб этди (2:1) ва муддатидан олдин Миллатлар лигаси плей-офф босқичига йўлланмани нақд қилди. Ўйиндан кейинги матбуот анжуманида эса жамоа бош мураббийи Жорже Жезушдан яна бир бор Криштиану билан боғлиқ вазият ҳақида сўрашди. Маълум бўлишича, вазият бироз юмшаган:
«Мен учун ҳали барчаси очиқ. Криштиану ўз ҳаётини ўзи ҳал қилиши керак. Бўлиб ўтган ишларнинг барчаси – катта тушунмовчилик ва менимча бу вазиятни ҳал қилиш осон. Агар у жамоада ўйнашни давом этса, истаган вақтида қайтиши мумкин. Нега йўқ бўлсин?
Криштиануга нисбатан ҳеч қандай ёмонлигим йўқ. Бунинг барчасини ҳал қилиш осон. Мен хафа бўлганим йўқ. Унинг ўзи ҳал қилади. Бу қачон бўладими? Бунисини мен билмайман, кўрамиз. Биз эндигина ўйинни тугатдик».
Ҳолбуки ўтган турда Данияга қарши ўйиндан кейинги матбуот анжуманида у бу масалада кескин фикр билдирганди (бу Роналду миллий жамоа қароргоҳидан кетиб қолганидан кейинги илк ўйин бўлганди):
«Бу вазият мени ўз қарашларимни қайта кўриб чиқишга мажбур қилдими? Йўқ, мутлақо. Юлдузли футболчилар бўлади, аммо қоидалар ҳамма учун бир хил. Мен бутун фаолиятим давомида доим шундай деб ҳисоблаганман ва шундай деб ҳисоблашда давом этаман».
Қайтиш федерация учун ҳам, Роналду учун ҳам фойдали
Норвегияга қарши ўйиндан олдинроқ португалиялик журналист Мигел Перейра talkSport учун берган интервюсида вазият тўғрисида атрофлича гапирганди. Унинг таъкидлашича, миллий жамоадагилар ва Роналду ўртасидаги муносабатлар илиқлаша бошлаган:
«Гап шундаки, у минглик маррага етиши учун яна 21 та гол қолди. У охирги голни Португалия сафида уришни жуда хоҳлайди. У «Ан-Наср» таркибида осонлик билан 15-20 гол уришни мўлжаллаган, аммо энг асосийси, ўзини, миллий жамоадаги тарихини шарафлайдиган зиёфат уюштиришни хоҳлайди. Ва бўлиб ўтган ишларга қарамай, мен бу рўй беришига ишонаман».
Унинг фикрича, маҳаллий футбол мулозимлари Роналдудан шунчаки воз кеча олмайди:
«Дастлабки соатларда вазиятга баҳо бериш қийин эди. Аммо ҳозир мен ҳақиқатан ҳам Криштиану лагери ва Жорж Жезуш лагери ўртасидаги алоқалар йўлга қўйилмоқда, деб ўйлайман. Португалия федерацияси Криштиану атрофидаги шов-шувдан манфаатдор. Менимча, Криштиану кейинги йил охирида сўнгги рақси учун қайтади».
