Испания бош вазири Педро Санчес парламентни тарқатиб юборди ва навбатдан ташқари сайловлар ўтказилишини эълон қилди. Ўтган ҳафтада унинг ҳукумати уй-жой инқирозига қарши чоралар бўйича овоз бериш жараёнида мағлубиятга учраганди. Сўнгги ҳафта давомида бу инқироз мамлакат сиёсий ҳаётидаги асосий мавзуга айланди.
Ўнг қанотдаги партиялар ҳукуматнинг қиммат уй-жойларга қарши чора-тадбирларини блоклади. Парламентда 2 октябр куни бўлиб ўтган овоз бериш жараёнида ҳукуматнинг ижарада яшовчиларни ҳимоя қилишга қаратилган иккита фавқулодда декрети овозга қўйилди. Ушбу ҳужжатларда 2030 йилгача кўчиришларга мораторий эълон қилиш, шунингдек, уй-жойларни қисқа муддатли ижарага беришга ҳамда хоналарни алоҳида ижарага беришга чекловлар жорий этиш таклиф қилинганди. Консерватив Халқ партияси, ултраўнг Vox ҳамда каталонларнинг Junts партияси бунга қарши чиқди. Халқ партияси ўз позициясини изоҳлаб, уй-жой билан таъминлаш муаммосини чекловлар жорий этиш эмас, балки янги қурилишлар орқали ҳал қилиш кераклигини таъкидлади.
Парламентдаги овоз бериш жараёни мамлакат бўйлаб 87 ёшли Марикармен Абаскал ҳимояси учун бўлиб ўтган намойишлар ортидан ўтказилди. Ушбу аёл ўз квартирасини тахминан 70 йил муқаддам ижарага олган, 2018 йилда эса унинг квартираси жойлашган кўчмас мулкни Urbagestión номли инвестиция компанияси сотиб олган ва ижара нархини бир неча бараварга оширган, бу нарх эса ижарачининг пенсия пулидан кўпроқ эди ва у эски нархда (500 евро) тўлашда давом этган. Компания уч марта уни квартирадан ҳайдаб чиқаришга уринган, аммо суд бу қарорни блоклаган. Тўртинчи уринишда эса аёл замбилга солинган ҳолда уйдан куч билан олиб чиқилган, шундан кейин у шифохонага тушиб қолган. Кекса ёшли аёл квартирасидан мажбуран чиқариб юборилаётгани акс этган кадрлар жамоатчиликда катта шов-шувга кўтарди. Мадридда бошланган намойишлардан кейин аёлга ушбу квартирада яшашда давом этишга рухсат берилди.
Вазият бу билан тинчимади ва юқори ижара нархларига қарши акциялар бошқа шаҳарларга ҳам тарқалиб, сўнгги вақтлардаги энг йирик норозилик намойишларига айланди. 3 октябр куни 50 га яқин шаҳарда намойишлар бўлиб ўтган, ташкилотчиларга кўра, уларда 500 мингга яқин киши қатнашган. Биргина Мадриднинг ўзида 70 минг киши кўчаларга чиққан.
