Қашқадарё вилоятининг Кўкдала туманида ИИБ ходими фермернинг фаолиятига қаршилик қилиб, ғалла ўримини тўхтатиб қўйди. У фермер хўжалик раҳбарини ўримни ҳеч кимдан рухсат сўрамасдан бошлаганликда айблаган.
ИИБ ходими ва фермер ўртасидаги суҳбат қуйидагича кечган:
— Сизга битта савол бераман, видеога олинг мени. Фермер хўжалигингизнинг номи нима?
— “Бобохатип”.
— 20 гектар шартнома қилганмисиз давлат билан?
— Албатта. Кластер билан.
— Хўп, сиз ўримни кимдан рухсат олиб бошладингиз?
— Кимдан рухсат сўрашим керак?
— Кластердан рухсат олдингизми?
— Кластер менга раҳбар эмас.
— Сектор раҳбаридан ёки қишлоқ хўжалиги бўйича ҳоким ўринбосаридан, қишлоқ хўжалиги бошқармасидан рухсат олдингизми? Ёки ички ишлар бўлимига хабар бердингизми? Ҳозир бу ерда бирор кор-ҳол бўлса ёки ўт чиқиб кетса ким жавоб беради?
— Мен жавоб бераман-да.
— Сиз нега жавоб берасиз? Ёнғин хавфсизлигига жавобгар шахс эмассиз-ку!
— Бўлмаса 20 нафар одамни чақиришим керак экан-да бу ерга мен?! “Скорий помош” ҳам чақирайлик, биров комбайндан тушиб кетиши мумкин. Нечта одам келиши керак?
— Гапни эшитинг, профилактика инспектори келади, комбайнга бир кишини, ташишга, талон-торожликнинг олдини олишга бир кишини бириктиради, тушуняпсизми?
— Ўзим экиб, ўзимни ўзим талон-торож қиламанми мен?
— Сиз ҳосилни олиб кетяпсиз, олдингиздан бир-иккитаси чиқиб, буғдойга тирмашса ёки бошқа бир нарса бўлса, нима бўлади?
— Ўша пайтда “02”га телефон қиламиз-да.
— Йўқ, кеч бўлади.
Воқеа жойида сектор раҳбари муовини, туман ЙҲХБ бошлиғи ва бошқа масъуллар бўлган. Улар ўримга қаршилик қилиб, комбайнни ноқонуний тарзда даладан олиб кетишган.
