2016 йилнинг 13 июлида Буюк Британия бош вазири лавозимига Тереза Мэй тайинланди. У сўнгги 26 йил ичида мамлакат ҳукумати тепасига келган биринчи аёлга айланди.
2016 йилнинг 1 октябрида Тереза Мэй 60 ёшга тўлди. Британия янги бош вазирининг таваллуд айёми муносабати билан у ҳақидаги қизиқарли маълумотларни эътиборингизга ҳавола қиламиз.
Тереза Мэйнинг болалиги, ўқувчилик ва талабалик йиллари Оксфордшир графлигида ўтган. Унинг отаси Уитли қишлоғида черков роҳиби бўлиб ишлаган. Тереза графликнинг давлат ва хусусий мактабларида таълим олган. 1977 йилда у Оксфорд университетини тугаллаган.
Мэй сиёсий карьеранинг барча поғоналарини босиб ўтган. У таълим, транспорт, атроф-муҳит, оила, маданият, меҳнат ва нафақа ишлари вазири, шунингдек Консерватив партия раиси лавозимларида фаолият олиб борган.
"Мен инсонлар ҳаётига реал ўзгаришлар киритиш ва муҳокамаларда иштирок этиш учун сиёсат билан шуғулланишга қарор қилдим. Аёл киши эканлигим менга ҳеч қачон тўсқинлик қилмаган", - дейди Мэй.
2010 йилда собиқ бош вазир Дэвид Кэмерон ҳукумат тепасига келганидан сўнг Тереза Мэй Бирлашган Қиролликнинг ИИВ раҳбари лавозимини эгаллаган ва бир вақтнинг ўзида, яъни 2010-2012 йилларда хотин-қизлар ва тенг ҳуқуқлилик масалалари бўйича вазирлик бошқарувини ўз қўлига олган.
"Мен анъанага кўра, эркаклар устунлик қиладиган икки соҳада ишлаганман - аввал банк соҳасида, кейин эса сиёсатда. Иккаласида ҳам аёл киши эканлигим менга тўсқинлик қилмаган", - дея таъкидлайди Тереза Мэй.
Тереза Мэйга қадар ҳукуматни бошқарганлар орасида фақатгина бир аёл киши бўлган, у ҳам бўлса "темир хоним" номини олган Маргарет Тэтчер (1925-2013). У вазирлар маҳкамасини 1979 йилдан то 1990 йилгача бошқарган. Мэйни доимо Тэтчерга қиёслашади, унинг ўзи эса бундай фикрдан йироқ. У "темир хоним"га юксак ҳурмат билан муносабатда бўлиши, бироқ сиёсатда унга намуна бўладиган инсоннинг йўқлигини таъкидлайди, у ўз йўлидан боришни маъқул кўради.
Тереза Мэй сиёсат оламида 30 йилдан ортиқ фаолият кўрсатаётган бўлса-да, унинг Даунинг-стритдаги бош вазир қароргоҳига келиши ҳеч кимнинг хаёлига ҳам келмаганди. Мамлакатнинг Европа Иттифоқидан чиқишига доир референдум ҳаммасини ўзгартириб юборди, зеро унинг натижаларига кўра, Дэвид Кэмерон ҳукумат раҳбари лавозимини тарк этди.
