Италия футболчилари майдонга чиққанида Белгия аллақачон иккинчи ўринга кўтарилиб олганидан хабардор эди. Ўйин стартида эса Доннарумма қўпол хатога йўл қўйди. «Сити» дарвозабони тўпни Олисе турган жойга ташлаб берди, у эса Барелладан осонлик билан қочиб кетиб, ҳисобни очди. Бу Жижи учун сўнгги беш ўйинда голга олиб келган учинчи хато бўлди.
Французлар тинимсиз ҳужум уюштирди, 20-дақиқага келиб олти бор зарба берилди, учтаси дарвоза соҳасига тўғри борди, аммо битта гол билан чекланишди.
Италия эса дарвоза томон тўғри борган илк зарбасини 26-дақиқада йўллади ва шунинг ўзи ҳисобни тенглаштириш учун кифоя қилди. Камбияги чап қанотда Гюстони осонлик билан ортда қолдириб, дарвозабон ҳудудида ўзини таклиф қилган Франческо Эспозитони голли пас билан таъминлади.
«Интер» форварди терма жамоадаги дастлабки 14 ўйинида аллақачон 9 гол уришга эришди. Таққослаш учун, «Скуадру адзурра» афсонаси Франческо Тотти бутун фаолияти мобайнида Италия сафида жами 9 та гол урганди.
Иккинчи бўлимда меҳмонлар сафида Мало Гюсто асосий антиқаҳрамонга айланди. Аввалига унинг Камбиягига ишлатган фолидан кейин пеналти белгиланди, аммо Себастияно Эспозито аниқ зарба бера олмади. Гюсто Камбиягининг ўрнига туширилган Димаркога ҳам қаршилик кўрсата олмади ва италиялик қанот ҳимоячисининг узатмасидан Фраттези ғалаба голини урди.
Мавзуга оид
Бироз ўтиб Упамекано жарима майдони ичида ишлатилган фолдан кейин Эспозитоларнинг кичиги пеналтини аниқ ижро этиб, голлари сонини 10 тага етказди. Зидан учун бу Франция миллий жамоаси бошқарувидаги илк мағлубият бўлди, Роберто Манчини эса Италияни гуруҳ пешқадамига айлантирди.
Беш ўйинда ютқазган Туркия иккинчи дивизионга тушиб кетадиган бўлди – бу турклар учун 80-йиллардан буён энг нохуш серия: ўшанда жамоа қаторасига саккиз ўйинда ютқазганди.
Плей-офф йўлланмасини муддатидан олдин ҳал қилган Испания Чехияга қарши ўйинда аралаш таркибни туширди, леки чехларга қарши мағлубиятсиз сериясини давом эттирди. Биринчи бўлим охирида Амброс жарима майдони ичида тўпни қўл билан ўйнаши ўйин тақдирини ҳал қилди. Алекс Баэна белгиланган пеналтини аниқ ижро этиб, ҳисобни очди.
Иккинчи бўлим бошида шу куни Ямалнинг ўрнига ҳужум чизиғига туширилган Йереми Пино иккинчи голни урганди, аммо офсайд ҳолати қайд этилиб, гол бекор қилинди. Кейин эса VAR аралашуви билан мезбонлар ҳимоячиси Крейчи майдондан четлатилди. Чехлар озчилик ҳолатида ҳам мағлубиятдан қутулиб қолиши мумкин эди, аммо Гложекнинг бошда йўллаган зарбасидан кейин тўп тўсинга борди. Ўйинга қўшиб берилган дақиқаларда эса Пубил испанларнинг ғалабасини мустаҳкамлади.
Испанияга қарши жами тўққиз бор ўйнаган Чехияда ҳамон бирорта ғалаба йўқ, бу ўйинлардан еттитасида мағлуб бўлинган.
Кейн Англия миллий жамоаси сафидаги 126-ўйинини ўтказиб, Питер Шилтонни ортда қолдирган ҳолда янги рекорд ўрнатди. «Уч шерлар» сардори бу ўйинда ҳам асосий ишларни бажарди. Аввалига унинг жарима майдонига диагонал узатмасидан кейин Беллингҳэм тўпни қулай вазиятда турган Рожерсга ташлаб берди ва ҳисоб очилди. Аммо Хорватия бу сафар осонлик билан таслим бўлишни истамади (биринчи даврадаги ўзаро ўйинда хорватлар Загребда 0:7 ҳисобида ютқазганди).
Иккинчи бўлимда инглизлар ҳимоясидаги қўпол хатодан кейин ҳисоб тенглашди: бурчак зарбасидан кейин Куанса тўпни бош билан дарвозабонга етказмоқчи бўлди ва Петар Сучичга гол совға қилди.
Лекин ушбу ҳимоячи тезда ўз айбини ювиб, рақиб жарима майдонида пеналти ишлади, Кейн эса ғалаба голини урди.
Англия Испания билан бирга муддатидан олдин Миллатлар лигаси чоракфиналига йўл олди. Бу босқичдаги жуфтликларни аниқлаш учун қуръа ташлаш маросим ўтказилади.
Арманистон ўтиш ўйинларида қатнашиш имконига эга бўлиши учун ўз уйида Кипрни мағлуб этиши талаб этиларди. Аммо Еревандаги ўйин стартида оролликлар ҳисобни очишди. Арманистоннинг «Пюник» клуби футболчиси Ясонас Пикис гол муаллифи бўлди.
Иккинчи бўлимда «Родина»нинг 20 ёшли форварди Артур Гарибян мувозанатни тиклади. Аммо шу куни жами 26 зарба йўллаган арманлар ғалаба қозона олмади.
Черногория эса Латвияга қарши ўз уйида кечган ўйинда драматик ғалабага эришди – 2:1. Ўйиндаги асосий воқеалар 57-дақиқада, Стефан Савич ҳакам билан баҳслашгани учун иккинчи сариқ карточкани олиб майдонни тарк этганида бошланди. 13 дақиқа ўтиб «Аталанта» форварди Никола Крстович бурчак зарбасидан кейин бош билан дарвозани ишғол этди, аммо кўп ўтмай меҳмонлар сафида Денис Мелник мувозанатни тиклади.
Ўйин тақдири эса қўшимча дақиқаларда ҳал бўлди. Душан Вуковичнинг зарбасидан кейин тўп икки устунга ҳам тегди ва дарвоза чизиғи устида тўхтаб қолди, фақат барчадан илдамроқ ҳаракат қилган Алекс Мараш уни тўрга киритиб юборишга улгурди – черногорияликлар озчилик бўлиб ўйнаганига қарамай, ғалаба қозонишнинг уддасидан чиқишди.
Беларуслар Виктор Гончаренко бошқарувида ажойиб давр ўтказмоқда: жамоа сўнгги тўрт ўйинда уч ғалаба ва бир дурангга эришди. Аммо кейинги ўйин гуруҳ пешқадами Албанияга қарши кечади.
Албания эса бу турда ўз майдонида Финландияни худди шу ҳисобда мағлуб этди. Биринчи бўлимнинг иккинчи қисмида Мучи жарима майдонига кириб келиб, олис тўққизликни аниқ нишонга олди, иккинчи бўлим бошида эса Манай Ҳюсайнинг узатмасини голга айлантирди. Энди Финландия якунда Беларусни очколар сони тенг келиб қолган тақдирда ҳам қувиб ўта олмайди (ўзаро ўйинларда 0:0, 0:1 ҳисоблари қайд этилган). Гончаренко В лигасига ўтиш баҳсларида иштирок этади.
