Сайловларни ютқазган Гамбия президенти бир қатор дипломатларни ишидан бўшатди

Сайловларни ютқазган Гамбия президенти Яйя Жамме уни ҳокимиятни мухолифат номзодига беришга чақирган, мамлакатнинг 12 нафар элчиси ва доимий вакилини ишидан бўшатди. Бу ҳақда "Франс Пресс" ахборот агентлиги хабар бермоқда.  

"Гамбия ҳукумати 12 нафар элчисини фаолияти тўхтатилгандан кейин чақиртириб олди", деб айтди мамлакат ташқи ишлар вазирлигидаги манба.

Унинг айтишича, бу дипломатлар "сайланган президент Адам Барроуни табриклашган ва қўллаб-қувватлашган".

Ахборот агентлиги маълумотларига кўра, Жамме Гамбиянинг Хитой, Буюк Британия, Туркия, Сенегал ва АҚШдаги элчиларини ҳамда мамлакатнинг БМТдаги доимий вакилини ўз лавозимидан бўшатган. Таъкидланишича, улар 2016 йил декарбь ойи охирида Жаммега лавозимини тарк этиш айтилган мактуб йўллашган.  

Гамбияда президентлик сайловлари 1 декабрда бўлиб ўтган. Сайлов комиссияси маълумотларига кўра, мухолиф Бирлашган демократик партияси номзоди Адам Барроу сайловларда 45,5 овоз билан ғолиб бўлган. Амалдаги президент Жамме эса 36,7 фоиз овоз тўплаган.

Жамме сайловлар натижаларини тан олмаслигини ва сайлов жараёнидаги жиддий қоидабузарликлардан афсусда эканлигини айтган. У ўзининг мағлубияти бўйича Олий судда баҳслашмоқчи. Бироқ ҳозирда Гамбияда Олий суднинг ўзи йўқ. Коалициянинг таъкидлашича, президент ўз муддатининг охирги кунлари арзномасини кўриб чиқиш учун судьялар белгилашга конституцион ҳуқуққа эга эмас.