АҚШнинг Ўзбекистондаги элчиси Жонатан Хеник ўзбек халқини Наврўз айёми билан табриклади.
«Аввало, Ўзбекистон президенти ва ҳукуматининг мамлакатда кенг қамровли ва ортга қайтмас ислоҳотларни амалга оширишга қаратилган фаолияти мени ҳайратда қолдирди. Биз иқтисодиётнинг жадал ривожланиши, шунингдек, Ўзбекистонни савдо ва инвестициялар учун истиқболли йўналиш сифатида кўраётган Америка компанияларининг қизиқиши ортиб бораётганини кўряпмиз.
Наврўз нафақат янгиланиш ва фаровонлик тимсоли бўлган ажойиб баҳор байрами, балки эришилган ютуқларни нишонлаш учун муҳим фурсатдир. Фурсатдан фойдаланиб, Ўзбекистон фуқароларига Наврўз байрами файзли бўлишини чин қалбимдан тилайман!» деган АҚШ элчиси.
Шунингдек, Озарбойжоннинг Ўзбекистондаги элчиси Гусейн Гулиев ўзбек халқини ушбу баҳор байрами билан табриклади.
«Ўзбекистон халқини баҳор, янгиланиш ва бунёдкорлик рамзи – Наврўз олам билан чин қалбимдан табриклайман. Бу ёрқин байрамда ўзбек халқининг улуғворлиги, чуқур анъаналари, матонати ва равнақига интилиши ўз ифодасини топган.
…Қардош Ўзбекистон халқига тинчлик, фаровонлик ва янада муваффақиятлар тилайман», дейди элчи.
Буюк Британиянинг Ўзбекистондаги элчиси Тимоти Смарт ҳам ўзбекистонликларни Наврўз айёми билан табриклади.
«Бу ерда бўлиш ва Наврўз байрамини, айниқса, шундай ажойиб даврда нишонлаш мен учун катта шарафдир. Саккиз йиллик ислоҳотлар Ўзбекистон ўз мавқейини мустаҳкамлаш йўлидаги таъсирчан йўлдан далолат беради. Мамлакат жаҳон саҳнасига қандай ишонч билан кириб келаётгани, бутун Марказий Осиё минтақасига наф келтираётгани кишини ҳайратга солади. Айниқса, Ўзбекистоннинг таълим ва маданият соҳасидаги ютуқлари эътиборга лойиқ.
