Россиялик ҳарбийлар томондан Суриянинг Даур-аз-Зор вилоятида, Фрот дарёси устидан қурилган кўчма кўприк сув остига кетди. Бундан кўприкнинг ҳаводан олинган суратлари дарак бермоқда.
Таъкидланишича, Фрот дарёсидан ўтувчи йиғма (понтон) кўприк тасодифан барбод бўлмаган. Бу ҳақда Россия қуролли кучларининг расмий босма органи маълум қилди.
Босма органнинг таъкидлашича, 6 январда дарёда сув сатҳи бир неча метрга кўтарилган, оқим тезлиги эса 2 мартага ошган. Кейинги кун эса кўприк қулаб тушган. Ушбу ҳолатни тергов қилган суриялик мутахассисларнинг фикрича, бу Ат-Табкадаги гидро электр станция тўғонидаги шлюзларнинг атайлаб очиб юборилиши оқибатида юз берган. ГЭС АҚШ бошчилигидаги коалиция назоратида жойлашган.
Айтилишича, кўприк 2017 йил 23 сентябрда қурилган. Унинг узунлиги 212 метрни, юк кўтарувчанлиги 60 тоннани ташкил қилган. 1 октябрда кўприк қочқинлар қайтаётган Фротнинг чап қирғоғидаги гуманитар вазиятни яхшилаш учун Сурия томонга топширилган. Бу ердаги қолган кўприклар эса жанговар ҳаракатлар оқибатида барбод бўлган.
