Кўприк Сичан — Шангри-Ла тезюрар автомагистрали таркибига киради. Тоғли ҳудудда йирик конструкцияларни баландликка кўтариш ва ўрнатиш юқори аниқликни талаб қилади.
Қурилишда Zoomlion компаниясининг R4300-200 русумли иккита минорали кранидан фойдаланилмоқда. Кўприкнинг ҳар бир асосий таянчи учун биттадан кран ажратилган. Уларнинг максимал юк кўтариш қуввати 200 тонна, қулочи узунлиги эса 80 метрга етади.
Компания маълумотига кўра, кранларда бошқарув ва хавфсизликка оид 20 дан ортиқ интеллектуал функция мавжуд. Улар орасида тўқнашувларнинг олдини олиш, юк оғирлигига қараб ишлаш тезлигини автоматик мослаштириш ва осилиб турган юкнинг ўз-ўзидан пастга тушиб кетишини чеклаш тизимлари бор.
Бу имкониятлар, айниқса, Шангри-Ла томонидаги таянчнинг сўнгги 103 метрлик қисмини қуришда муҳим бўлган. Қурувчилар марказий кўндаланг тўсин устига якуний пўлат ва бетон секцияларни ўрнатиши керак эди. Ўзгарувчан шамол эса юкни барқарор ушлаб туриш ва конструкция қисмларини аниқ туташтиришни қийинлаштирган.
Операторлар видеокамералар орқали иш жараёнини кузатиб, кранларни ердан туриб масофадан бошқарган. Бу ўрнатилаётган қисмларни яхшироқ кўриш ва монтаж пайтида зарур тузатишларни киритиш имконини берган.
Zoomlion баёнотига кўра, таянч секцияларини кўтариш ва ўрнатиш ишлари хавфсиз бажарилган. Компания кўприкнинг умумий узунлиги ва ҳаракат учун қачон очилишини маълум қилмаган.
