Мисрнинг олий конституциявий суди 3 март куни Саудия Арабистони билан денгиз чегарасининг демаркацияси бўйича келишувни қўллаб-қувватлади. Унга кўра Қизил денгиздаги Тиран ва Санафир баҳсли ороллари Саудия Арабистони суверенитетига ўтади.
Ушбу суд инстанциясининг қарори якуний ҳисобланади ва уни қайта кўриб чиқиб бўлмайди. Шу тариқа оролларга эгалик қилиш масаласининг бошқача талқин қилинишига йўл қўядиган суд инстанциялари қарорлари бекор қилинади.
Ар-Риёд назорати остига 2 та орол берилишини назарда тутувчи демаркация ҳақидаги келишув 2016 йил апрелда имзоланган ва Миср жамоати томондан норозиликка сабаб бўлган.
Охирги аср давомида оролларга эгалик қилиш бир неча марта бир давлатдан иккинчисига ўтган. 1967 йилги урушдан кейин бу ороллар Синай яримороли билан бирга Исроил назорати остида бўлган, Синай 1982 йилда Мисрга қайтарилгандан кейин ороллар Мисрга ўтган, ваҳоланки унга Саудия Арабистони даъвогарлик қилган.
Икки давлат ўртасида денгиз чегарасининг белгиланиши 2010 йилда амалга оширилган. Ар-Риёд БМТ конвенцияларига мувофиқ ҳолда ўзининг дастлабки денгиз чегаралари делимитациясини эълон қилган ва Миср буни расман тан олган.
