Чиқинди инқирози. Москва вилоятида болалар оммавий заҳарланиши ортидан ғазабга минган халқ ҳокимни урди

21 март куни Москва вилояти, Волоколамск шаҳридаги марказий шифохонага турли мактаблардан 50 нафардан ортиқ бола олиб келинди. Улар ўзларини жуда ёмон ҳис қилар, кўнгли айниб қусар ва бурунларидан қон кетарди. Москвадан 100 километр масофада жойлашган, 20 минг киши истиқомат қиладиган бу шаҳардаги № 2 мактабнинг 23 нафар ўқувчиси шошилинч тарзда шифохонага ётқизилди. Аввалига улар мактабда газ баллонидан газ сизиб чиқиши оқибатида заҳарлангани тусмол қилинганди. Куннинг иккинчи қисмида шаҳар шифохонасига бош айланиши ва қусишдан шикоят қилаётган яна 34 нафар мактаб ўқувчиси мурожаат қилди.

Волоколамск шаҳри мэри Петр Лазарев РБК учун берган интервьюсида болаларнинг аҳволи оғирлиги ҳақида маълумот берди: «Вазият жуда оғир. Болалар мактаблардан ўнлаб тез тиббий ёрдам машиналарида олиб келинмоқда. Қабулхона ота-оналар билан тўлган, улар болаларга аниқ ташхис қўйилишини талаб этишмоқда. Врачлар бу заҳарланиш эканини айтишмоқда».

Маҳаллий аҳоли вакиллари болаларнинг аҳволи ёмонлашишини «Ядрово» полигонига ташланган чиқиндилардан тарқалган газ билан боғлади (полигон шаҳардан 3,3-4 км масофада). Волоколамск тумани маъмурияти 21 март кунига ўтар кечаси катта миқдордаги газ чиқиндилари тарқалганини тасдиқлади. Туман ҳокимияти матбуот хизматига кўра, воқеа жойида оператив штаб фаолият олиб борди ва хавф манбалари бартараф этилди.

Ҳокимият 21 март куни болаларга мактабларга ва боғчаларга бормасликка рухсат берган. Маҳаллий аҳоли вакиллари иш жойларида ниқоб таққан ҳолда ўтиришга тўғри келганини маълум қилган.

Тез орада шифохона атрофида 200дан ортиқ киши тўпланди, улар шифокорлар аниқ ташхис қўйишини, «Ядрово» полигони ёпилишини талаб қила бошлашди.

«Медуза» нашрида ёзилишича, ҳокимият вакиллари шифокорларга босим ўтказиб, «болаларнинг заҳарланишини полигон билан боғламасдан ташхис қўйишни» талаб этишган.

21 март куни соат 16:00да бу ерга сиёсатчи Ксения Собчак келди. У шифохонада ётган болаларнинг ота-оналари ва маҳаллий аҳолининг бошқа вакиллари билан гаплашди. У шунингдек, шифохонанинг бош шифокори, вилоят соғлиқни сақлаш бошқармаси бошлиғи Владимир Ющук ҳамда вилоят омбудсмени Марина Юденич билан учрашди.

«Мен бу чиқиндихона ёпилиши учун қўлимдан келадиган барча ишни қиламан. Биз бу масалани мутахассислар билан муҳокама қилдик, улар дегазация жараёни вақт талаб этишини айтишмоқда, бир кунда натижага эришиб бўлмайди, аммо Воробьев бир ҳафтадан кейин шаҳарда газ чиқиндилари бўлмаслигига ваъда қилди. Ҳозир биз губернатор бу ваъдасини бажаришини талаб қиламиз. Улар мени алдамоқчи бўлган бўлишлари мумкин, аммо мен қўлимдан келган барча ишни қиламан», — дея ёзди Собчак фейсбукдаги саҳифасида.

Туман ҳокими Евгений Гаврилов оломон ичида қолиб кетди. Уни маҳаллий аҳоли жуда ёмон қаршилади. Одамлар тинмасдан «позор» дея ҳайқиришди, унга сўкинишди, таҳдид қилишди, унинг бошига уришди, ҳоким калтакланишига бир бахя қолди.

Тез орада ОМОН автомобиллари ҳамроҳлигилда Москва вилояти губернатори Андрей Воробьев ҳам шифохонага келди. У жабрланган болаларни шаҳардан болалар лагерига олиб боришга ва Волоколамскда чиқиндиларни сараловчи станция қурдиришга ваъда берди. Камералар қаршисида гапириб бўлганидан кейин ортига бурилиб кета бошлаганида одамлар унга қор ота бошлашди, сўкиниш сўзлари давом этди.

Губернатор ва ҳоким кетганидан сўнг, тинч намойиш ҳам якунланди. 

Хабарларга кўра, маҳаллий аҳоли «Ядрово» полигони хўжайинларини судга беришган. Даъво аризасида чиқиндихона фаолияти аҳолининг конституцион ҳуқуқларини бузаётгани кўрсатилган. 

РФ бош прокуратураси Подмосковье прокурорига Волоколамскдаги ҳодиса бўйича шикоятни ўрганишни топширган.

«Ядрово» полигони 2008 йилда фаолият бошлаганди. Бу ерга Москва шимоли-шарқидаги барча чиқиндилар ташланади. 2017 йил апрелида Волоколамск тумани аҳолиси нохуш ҳиддан шикоят қила бошлаганди. Улар шу вақтгача бир неча марта норозилик акциялари ўтказишган, полигонга олиб борадиган автомобиль йўлини тўсиб қўйишган, аммо полигон ёпилишига Роспотребнадзор ҳам эриша олмаганди.

Қайд этиш керакки, Россияда ўтган президентлик сайловларида Москва вилояти бўйича энг паст давомат Волоколамск туманида қайд этилди.