WADA Халқаро бокс ассоциацияси мақомини қайтарди

Фото: Reuters

Бутунжаҳон антидопинг агентлиги (WADA) Бутунжаҳон антидопинг кодекси талабларига кўра, Халқаро бокс ассоциацияси (АИБА)нинг мақомини қайта тан олди. Бу ҳақда «Советский сорт» нашри хабар тарқатди.

2017 йилнинг декабрида WADA АИБАни агар антидопинг кодекси билан мувофиқ иш олиб бормаса, бокс спорт турини олимпиада ўйинларидан чиқариб ташлаш билан огоҳлантирганди.

«WADAнинг АИБАни бутунжаҳон антидопинг кодексига мувофиқ ишлаётганини тан олиб, унинг мақомини қайтариш бу катта натижа. Айниқса бунга жуда қисқа вақтда эришилгани янада эътиборга молик. Бу АИБАнинг олдинги раҳбариятидан мерос бўлиб қолган муаммолардан қутулиб бораётгани ва ишонч билан олдинга интилаётганидан далолат беради», — деган AIBA ижрочи директори Том Виржетс.

Олдинроқ, Виржетс АИБА Олимпиада ўйинларидан чиқиб кетиш хавфи остида қолганини жиддий қабул қилгани ва бу борада тегишли ишлар олиб борилаётганини маълум қилганди.

Эслатиб ўтамиз, январь ойидан буён АИБАни асли ўзбекистонлик тадбиркор Ғофур Раҳимов бошқариб келмоқда.

#WADA #АИБА #ҳаваскор бокс

Халқаро олимпия қўмитаси ўзбекистонлик Ғофур Раҳимов AIBA президенти бўлишини истамаяпти ва бокс спортини олимпиада дастуридан чиқариш билан таҳдид қилмоқда