Тошкентда ЙПХ машиналарида янги турдаги видео қайд этиш мосламаси синовдан ўтказилмоқда

Тошкент шаҳар ИИББ ЙПХ машиналарида янги турдаги видео қайд этиш мосламасини синовдан ўтказмоқда. Бу ҳақда пойтахт ИИББ ахборот хизмати хабар берган.

Қайд этилишича, ушбу замонавий мосламанинг бошқаларидан фарқи шундаки, у нафақат ташқи манзарани балки бир вақтнинг ўзида ЙПХ автомобили салонининг ичини ҳам тасвирга олади. 

Узлуксиз ишлаб турувчи ушбу қурилма кодланган бўлиб, ЙПХ ходимининг уни ўчириб ёқиши, тасвирларни йўқ қилиши имконсиз. 

Бу биринчидан, ЙПХ ходими ишининг шаффофлигини таъминласа, иккинчидан хизмат мажбуриятлари ижросини назорат қилиш ишларини осонлаштиради.