У 13 ёшида жиддий касаллик билан оғриди, бироқ бу ҳаммаси тугади дегани эмас...

Тақдир инсонни кўплаб синовларга бардош беришга мажбур қилади. Шундай синовларга бардош бераётган бир оиланинг KUN.UZ таҳририятига қилган мурожаати диққатимизни тортди.

Вова исмли болакай ўткир лимфобласт лейкоз хасталиги билан кўп вақтдан бери курашиб келмокда. 13 ёшли боланинг тақдирида ана шундай кунлар битилган экан. Унга 2017 йилнинг август ойида ўткир лимфобласт лейкоз ташхиси қўйилган. Лейкоз (оқ қон) – қон ишлаб чиқарадиган тўқималарнинг ўсма касаллиги. Қонда ўзига хос ўзгариш бўлиб, нормал қон ҳосил бўлиш жараёни бузилади. Касаллик сабаби фанга номаълум.

Суяк иликларини кўчириб ўтказиш йўли билан бу касалликнинг олдини олиш мумкин. Операция амалиёти Ҳиндистонда ўтказилиши режалаштирилган. Унинг нархи 30 минг АҚШ доллари қилиб белгиланган. Шу пайтгача турли хайрия акциялари ва ижтимоий тармоқлар орқали 16225 АҚШ доллари йиғилган. Яна 13775 АҚШ доллари миқдорида маблағ йиғилиши керак. Табиийки, оиланинг моддий аҳволини ҳисобга олсак, ҳозир бу маблағни топиш имкони бўлмаяпти. Онасининг фарзанди ҳақида айтган ҳар бир сўзида изтироб ва оғир ўкинч бор. Келинглар, уларга ўз ёрдамимизни аямайлик.