Хитой раҳбари Африка бўйлаб турне бошлади

Хитой Халқ Республикаси раиси Си Жинпинг 21 июль куни расмий ташриф билан Сенегал пойтахти Дакар шаҳрига келди. Бу ҳақда Le Monde нашри хабар бермоқда.

10 йилдан буён Сенегалга илк сафарини амалга ошираётган Си Жинпингни Дакарда аэропортда мамлакат президенти Маки Сол ҳамда унинг рафиқаси кутиб олган.

21 июль куни тунда икки давлат раҳбарлари ўртасида юзма-юз учрашув бўлиб ўтди. Учрашувдан сўнг ташкил этилган матбуот анжуманида Сенегал президенти Сол Хитой раҳбари билан «икки томонлама ҳамкорлик, Хитой-Африка алоқалари ва халқаро воқеалар» юзасидан фикр алмашганини маълум қилди. Ўз навбатида Хитой раҳбари ҳам «Хитой-Африка алоқаларининг ёрқин келажагига ишониши»ни айтиб ўтди.

Икки давлат раҳбари суд тизими, иқтисодий ва техник ҳамкорлик, фуқаро авиацияси ва инсон капиталини шакллантириш соҳаларида 10дан ортиқ шартномаларни имзолади.

Хитой Сенегалнинг Франциядан кейинги иккинчи йирик иқтисодий ҳамкори ҳисобланади. Икки мамлакат ўртасидаги ўзаро товар айирбошлаш ҳажми 2016 йилда 2 миллиард долларни ташкил қилган. Шунингдек, Хитой Сенегал учун Франциядан кейин иккинчи импортёр мамлакат ҳисобланади. Хитойдан импорт қилинган маҳсулотлар ҳажми 2013 йилда 346 миллион еврони ташкил қилган бўлса, бу кўрсаткич 2017 йилга келиб 559 миллион еврога етган. Ўз навбатида, Сенегал ҳам Хитойга асосан кимёвий минераллар экспорт қилади. 2017 йилда экспорт ҳажми 117 миллион еврони ташкил қилган.

Сенегалдаги кўплаб инфраструктуралар, жумладан стадионлар, автомобиль йўллари, битта шифохона, битта Катта театр, миллий кураш аренаси ва қора танли халқлар цивилизацияси музейи Хитой томонидан қурилган.

Си Жинпинг 22 июль куни Сенегалдаги ташрифини якунлайди. Унинг навбатдаги манзили Руанда ҳамда Жанубий Африка Республикаси бўлади.