24 сентябр куни Трамп Си Жинпинг шарафига Оқ уйда тантанали давлат зиёфати уюштирган. Унда Американинг йирик технология компаниялари вакиллари, жумладан, Tesla раҳбари Илон Маск, Apple раҳбари Тим Кук ва OpenAI раҳбари Сэм Алтман қатнашган.
Трамп нутқида АҚШ ва Хитой ўртасидаги шахсий алоқаларга урғу бериб, икки мамлакат ҳеч қачон бир-бирини ҳозиргидек яхши тушунмаганини айтган.
Си Жинпинг эса вазминроқ оҳангда сўзлаб, ҳар икки давлат масъулиятли буюк давлатлар сифатида ҳаракат қилиши ва ўзаро муносабатларга янгича ёндашув топиши кераклигини таъкидлаган.
Тайван масаласи
Зиёфатдан олдин ўтказилган икки томонлама музокараларда Тайван масаласи ҳам кўтарилган. Хитойнинг «Синхуа» давлат ахборот агентлигига кўра, Си Жинпинг АҚШни Тайван мустақиллигига қарши чиқишга чақирган.
DW ёзишича, Трамп май ойида Хитойга ташрифидан кейин Тайванга қарийб 14 млрд долларлик қурол-яроғ пакети етказиб берилишини тўхтатиб турган ва бу масалани музокара предмети деб атаган.
Сунъий интеллект ва технологиялар экспорти
Си Жинпинг сунъий интеллект жадал ривожланаётган шароитда ушбу технология доимо инсон назоратида қолиши кераклигини билдирган.
Хабарда келтирилган манбаларнинг баҳосича, зиёфатда технология соҳаси вакиллари қатнашганига қарамай, Трамп Америка технологиялари экспортига қўйилган қатъий чекловларни сақлаб қолиши кутилмоқда. Хитой эса мазкур чекловларни юмшатишга интилмоқда.
Эрон бўйича келишмовчиликлар сақланиб қолди
АҚШ ва Исроилнинг Эронга қарши уруши масаласида ҳам томонларнинг позициялари яқинлашмаган. Си Жинпинг ўт очишни тўхтатиш режимига қайтиш тарафдори эканини билдирган.
Украина масаласи ҳам музокаралар кун тартибидан ўрин олган, бироқ хабарда бу йўналишда эришилган аниқ келишувлар келтирилмаган.
Трамп қурилиш лойиҳаларини ҳам намойиш этди
Дипломатик мулоқотдан ташқари, Трамп меҳмонларга Оқ уй ҳудудидаги қурилиш лойиҳаларини кўрсатиш учун ҳам зиёфатдан фойдаланган. У иштирокчиларни янги бал зали қурилаётган майдонни кўздан кечиришга таклиф қилган.
