Қирғизистон президенти Сооронбай Жээнбеков Қозоғистон пойтахти куни муносабати билан мамлакат етакчиси Нурсултон Назарбоевга юз йил муқаддам Осиёда ясалган ноодатий самоварни совға қилди.
Ушбу самовар Қозоғистон Республикаси биринчи президентининг кутубхонасига экспонат сифатида топширилди.
Самоварларнинг тарихи 1740 йилдан бошланади. Биринчи самоварлар Уралдаги Демидов заводларида ясалган. Бир муддатдан сўнг Тула корхоналари ҳам самоварларни ишлаб чиқаришга қўшилди. Марказий Осиёнинг Россия империясига қўшилишидан сўнг самоварларга эҳтиёж ошиб борди. Бунинг сабаби Марказий Осиёдаги чой маданиятининг машҳурлиги эди, дейилади кутубхона сайтида.
Бир неча рус тадбиркорлари Бухоро ва Самарқандда Осиё самоварларини ишлаб чиқаришни ташкил этишди. Осиё самоварлари шакли, безаги билан алоҳида ажралиб турган.
