Бир ҳафтада 180 ЙТҲ юз берди, 27 нафар фуқаро ҳалок бўлди

Ички ишлар вазирлиги йўл ҳаракати хавфсизлиги бош бошқармаси матбуот хизматининг маълум қилишича, ўтган ҳафтада автомобиль йўлларида жами 180 йўл-транспорт ҳодисаси содир этилган. Натижада ушбу ҳодисаларда 27 нафар фуқаро ҳалок бўлган, 177 нафар фуқаро турли даражадаги тан жароҳатлари олган, деб ёзяпти ЎзА.

Ҳафта давомида йўл-патруль хизмати инспекторлари томонидан жами 84 минг 977 қоидабузарликлар аниқланган. Уларнинг 40 минг 701тасини қўпол қоидабузарликлар ташкил этади. Жумладан, 1 минг 568 нафар ҳайдовчи транспорт воситасини маст ҳолда бошқарган, 11 минг 944 нафар ҳайдовчи белгиланган тезлик талабларини бузган, 1 минг 161 нафар ҳайдовчи светофор ва чорраҳалардан ўтиш қоидасига амал қилмаган. Шунингдек, 12 минг 402 нафар ҳайдовчи одам ташиш қоидасини бузгани, 360 нафар ҳайдовчи темир йўл кесишмаларидан ўтишда қоидага риоя қилмагани учун тўхтатилди ва уларга нисбатан маъмурий баённомалар расмийлаштирилди.

Бундан ташқари, транспорт воситасининг ойналарини меъёридан ортиқча қорайтирган 668, ҳаракат вақтида телефондан фойдаланган 870 ва хавфсизлик камарларини тақмасдан ҳаракатланган 14 минг 946 нафар ҳайдовчига нисбатан ҳам тегишли чоралар кўрилди.

Эслатиб ўтамиз, аввалроқ Сирдарёда “Кобальт”нинг “МАN” орқа қисмига урилиши натижасида 2 киши ҳалок бўлгани хабар қилинганди.