Жамият | 18:43 / 17.08.2018
13079
3 дақиқада ўқилади

Тошкентда аёл ва унинг икки фарзандини уриб қочиб кетган ҳайдовчи ушланди

Фото: ИИББ ахборот хизмати

7 август куни Юнусобод тумани Бодомзор кўчасида соат 22.40да «Матиз» русумли автомобиль ҳайдовчиси 25 ёшли Мунирани уриб юборган. Бу пайтда аёл икки фарзанди билан йўлдан ўтаётган бўлган. Бахтли тасодиф туфайли болаларга шикаст етмаган, бироқ Мунира тан жароҳатини олган. Уларга биринчи ёрдам кўрсатиш ўрнига машина ҳайдовчиси воқеа жойидан қочиб кетган. Она-болаларнинг бахтига йўловчилар «тез ёрдам»га қўнғироқ қилишган, деб хабар бермоқда ИИББ ахборот хизмати.

Ушбу ҳолат юзасидан Ўзбекистон Республикаси Жиноят Кодексининг 266 ва 117-моддалари билан жиноят иши қўзғатилди. Олиб борилган тезкор тадбирлар натижасида куни кеча ушбу ЙТҲни содир этган шахс – 58 ёшли И.Исмоил ушланди. Ҳозирда тергов ҳаракатлари олиб борилмоқда.

Йўл-транспорт ҳодисаси содир бўлганда ҳайдовчилар қуйидагиларни бажаришлари шарт:

транспорт воситасини дарҳол тўхтатиши, авария ишораларини ёқиши ва авария сабабли тўхташ белгисини ўрнатиши, транспорт воситасини ва ҳодисага дахлдор буюмларни жойидан қўзғатмаслиги;

шикастланганларга биринчи тиббий ёрдам кўрсатиш чораларини кўриши, тез тиббий ёрдам ва фавқулодда қутқарув хизматларини чақириши, шошилинч ҳолларда эса шикастланганларни яқин орадаги даволаш-профилактика муассасасига йўлакай транспорт воситасида жўнатиши, бунинг имкони бўлмаган ҳолларда ўз транспорт воситасида олиб бориши, у ерда ўз исми-шарифи, транспорт воситасининг рўйхатдан ўтказиш давлат рақам белгиси ҳақида ахборот бериши (ўз шахсини тасдиқловчи ҳужжатни ёки ҳайдовчилик гувоҳномасини ва транспорт воситасининг рўйхатдан ўтганлик ҳужжатини кўрсатиши) ва ҳодиса рўй берган жойга қайтиб келиши;

агар бошқа транспорт воситаларининг ҳаракатига тўсқинлик қилса қатнов қисмини бўшатиши. Қатнов қисмини бўшатиш ёки шикастланганларни ўз транспорт воситасида даволаш-профилактика муассасасига олиб бориш зарур бўлганда, йўл-транспорт ҳодисасига дахлдор ҳайдовчилар аввало транспорт воситаси, ҳодисага алоқадор буюмлар ва изларнинг ҳолатини гувоҳлар иштирокида дастлабки қайд этишни амалга ошириш, уларнинг йўқолмаслиги ва ҳодиса рўй берган жойни айланиб ўтишни ташкил қилишнинг барча чораларни кўриши;

ҳодиса ҳақида ИИОга хабар бериши, гувоҳларнинг исм-шарифини ва яшаш манзилини ёзиб олиб, ИИО ходимларининг келишини кутиши.

Мавзуга оид