Хоразм вилояти комплекс ижтимоий-иқтисодий ривожлантирилади

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “2018-2019 йилларда Хоразм вилоятини комплекс ижтимоий-иқтисодий ривожлантириш бўйича қўшимча чора-тадбирлар тўғрисида”ги қарори лойиҳаси жойлаштирилди.

Ҳужжатда қайд этилишича, ҳудудни ривожлантиришда бир қатор тўсиқлар ва камчиликлар мавжуд. Хусусан, вилоятда табиий минерал хом-ашё ресурсларнинг мавжуд эмаслиги, саноат муҳандислигига оид интеллектуал қобилияти юқори бўлган мутахассисларнинг тарқоқлиги, уларни бир жойда бирлашмаганлиги, жаҳон андозаларида ишловчи технологияларнинг келтирилмаганлиги хом-ашё ресурслари талаб этилмайдиган инновацион ишланмалар ҳаётга татбиқ этилмаслигига сабаб бўлмоқда.

Шунингдек, саноат соҳасини ривожлантириш бўйича бир қатор имтиёзлар ва преференциялар, зарур шарт-шароитлар яратиб берилган бўлишига қарамасдан тижорат банклари, солиқ идоралари ва бошқа тегишли ташкилотлар томонидан етарли даражада тарғибот ишлари олиб борилмаётганлиги сабабли мавжуд салоҳиятдан етарлича фойдаланилмаяпти.

Ҳужжат билан Хоразм вилоятини 2018-2019 йилларда ривожлантиришнинг асосий устувор йўналишлари қилиб қуйидагилар белгиланиши мумкин:

саноат соҳасида енгил саноат йўналишини ривожлантириш ҳисобига пахта толасини чуқур қайта ишлаш ва ундан тайёр мато, газлама ва трикотаж маҳсулотларини ишлаб чиқариш, мева-сабзавот, гўшт ва сут маҳсулотларини қайта ишлаш, электротехника, автомобилсозлик ва қишлоқ хўжалиги машинасозлиги ҳамда кимё саноати соҳаларини ривожлантириш, саноатда инновацион ишланмаларни кенг жорий қилиш;

қишлоқ хўжалигида мева-сабзавотчиликни ривожлантириш, интенсив боғлар, замонавий иссиқхоналар ва тутзорлар ташкил қилиш ҳамда паррандачилик ва балиқчиликни интенсив усулларда ривожлантириш;

хизматлар соҳасида туристик хизматларни диверсификациялаш, янги туризм йўналишларини ривожлантириш, хусусий тиббиёт хизматини ривожлантириш, давлат-хусусий шерикчилик асосидаги мактабгача таълим муассасаларини ташкил қилиш.

Хоразм вилоятини 2018-2019 йилларда комплекс ижтимоий-иқтисодий ривожлантириш бўйича чора-тадбирлар дастури тасдиқланади:

2018-2019 йилларда Хоразм вилоятини комплекс ривожлантиришнинг мақсадли параметрлари;

саноат, хизмат кўрсатиш ва қишлоқ хўжалиги соҳасидаги инвестиция лойиҳаларининг туманлар кесимида йиғма жадвали ва манзилли рўйхати;

тармоқ корхоналари томонидан амалга ошириладиган инвестиция лойиҳаларининг манзилли рўйхати;

енгил саноат йўналишида амалга ошириладиган инвестиция лойиҳаларининг манзилли рўйхати;

гўшт, сут ва мева-сабзавот маҳсулотларини қайта ишлаш бўйича амалга ошириладиган инвестиция лойиҳаларининг манзилли рўйхати;

иссиқхоналар бўйича амалга ошириладиган инвестиция лойиҳаларининг манзилли рўйхати;

балиқчиликни ривожлантириш бўйича амалга ошириладиган инвестиция лойиҳаларининг манзилли рўйхати;

туризм соҳасини ривожлантириш бўйича амалга ошириладиган инвестиция лойиҳаларининг манзилли рўйхати;

тўғридан-тўғри хорижий инвестициялар иштирокида амалга ошириладиган инвестиция лойиҳаларининг манзилли рўйхати;

тўғридан-тўғри хорижий инвестициялар иштирокида амалга ошириладиган истиқболли инвестиция лойиҳаларининг манзилли рўйхати;

қурилиши тугалланмаган, бўш турган нотурар бино ва иншоотлар, фойдаланилмаётган ишлаб чиқариш майдонлари негизида амалга ошириладиган инвестиция лойиҳаларининг манзилли рўйхати;

барча тоифадаги бўш турган объектлар негизида амалга ошириладиган инвестиция лойиҳалари бўйича чора-тадбирлар;

соғлиқни сақлаш соҳасидаги хусусий клиникаларни ривожлантириш бўйича амалга ошириладиган инвестиция лойиҳаларининг манзилли рўйхати;

мактабгача таълим муассасалари бўйича давлат-хусусий шерикчилик асосида амалга ошириладиган инвестиция лойиҳаларининг манзилли рўйхати;

таълим муассасалари, соғлиқни сақлаш, маданият ва спорт объектлари ҳамда бошқа йўналишдаги объектларни қуриш, реконструкция қилиш ва мукаммал таъмирлаш бўйича чора-тадбирлар;

бандлик даражасини ошириш, қурилиш, экология, туризм ва бошқа соҳаларда амалга ошириладиган ишлар бўйича чора-тадбирлар;

йўл-транспорт инфратузилмасини такомиллаштириш, алоқа тармоқларини реконструкция ва модернизация қилиш ҳамда аҳолининг яшаш шароитларини яхшилаш бўйича чора-тадбирлар;

ирригация ва мелиорация тизимини яхшилаш бўйича чора-тадбирлар;

республика даражасида ҳал қилиниши лозим бўлган муаммоларни бартараф этиш бўйича чора-тадбирлар режаси тасдиқланиши мумкин.

Хоразм вилояти ҳокимлиги:

Ўзбекистон Республикаси Инвестициялар бўйича давлат қўмитаси, Молия вазирлиги, Иқтисодиёт вазирлиги, манфаатдор давлат ва хўжалик бошқаруви органлари, тижорат банклари, лойиҳа ташаббускорлари билан биргаликда Дастурнинг сўзсиз бажарилишини ҳамда бу борада инвестиция лойиҳаларининг ўз муддатида ва сифатли амалга оширилишини, ишлаб чиқаришнинг мўлжалланган ҳажмлари ўзлаштирилишини ва янги иш ўринлари ташкил этилишини таъминлайди;

муаммоли масалаларни ҳар ҳафтада жойига чиққан ҳолда ўрганиб бориш, уларни тезкорлик билан ҳал этиш бўйича амалий чоралар кўради;

тегишли вазирлик, идора ва ташкилотлар билан биргаликда Дастур доирасида лойиҳа ташаббускорларига ер участкаларини ажратиш бўйича ҳужжатларни тайёрлаш ва белгиланган тартибда улар номига расмийлаштириш учун Хоразм вилоятининг тегишли туман (шаҳар) ҳокимлигига киритилишини, шунингдек Давлат хизматлари агентлиги орқали объектларда қурилиш-монтаж ишларини олиб боришга рухсатномалар берилишини таъминлайди.