Жанубий Кореяда алоқа тизимида йирик миқёсдаги узилиш содир бўлди

Жанубий Кореянинг иккинчи ўринда турувчи КТ операторининг қурилмалар хонасида юз берган ёнғин сабабли Сеулнинг бир қисми интернетсиз ва телефон ҳамда мобиль алоқасиз қолди. Бу ҳақда YTN телеканали хабар берди.

Маълумотларга кўра, ёнғин телекоммуникация қурилмалари жойлашган ва оптик толали алоқа кабеллари ўтган бино ертўласида содир бўлган. Ёнғинга қурилмаларни совутиш тизимининг ўчиб қолганлиги, узлуксиз қувват батареяларининг хавфли ҳолатда жойлаштирилганлиги ҳамда ўт ўчириш тизимининг ишдан чиққанлиги сабаб бўлган деб тахмин қилинмоқда. Ёнғинни ўчириш учун ўн соатдан ортиқ вақт кетган. 

Оқибатда Сеулнинг бешта марказий муниципалитети ва Коян шаҳрида интернет, мобиль ва телефон алоқаси ишламаяпти. Кўп жойларда тўлов учун фақат нақд пул қабул қилинмоқда.

Компания вакилларининг сўзларига кўра, алоқани тиклаш ишларига камида бир ҳафта кетади.