«Барселона» Чемпионлар лигаси чоракфиналида «Манчестер Юнайтед»ни иккинчи ўйинда ҳам мағлуб этди (3:0) ва яримфиналга йўл олди.
Чемпионлар лигаси. 1/4 финал. Жавоб ўйини
«Барселона» – «Манчестер Юнайтед» – 3:0 (2:0)
Голлар: Месси, 16 (1:0). Месси, 20 (2:0). Коутинью, 61 (3:0).
«Барселона»: тер Штеген, Сержи Роберто (Семеду, 71), Пике, Лангле, Жорди Альба, Ракитич, Бускетс, Артур (Видаль, 75), Месси, Суарес, Коутинью (Дембеле, 81).
«Манчестер Юнайтед»: де Хеа, Жонс, Линделёф, Смоллинг, Янг, Мактоминэй, Погба, Фред, Лингард (Санчес, 80), Рэшфорд (Лукаку, 73), Марсиял (Далот, 65).
Огоҳлантириш: Суарес, 77.
Ҳакам: Брих (Германия).
16 апрель. Барселона. «Камп Ноу».
Биринчи ўйин – 1:0.
Тўртинчи уриниш
2015 йилда «Ювентус»ни мағлуб этиб, Чемпионлар лигасини қўлга киритган «Барселона» кейинги 3 мавсумда турнирдаги иштирокини чорак финалда тўхтатганди. Бу каталонлар жамоаси мухлислари учун аламли факт, қолаверса бу 3 мавсумда «қулоқли кубок»ни «Реал» ўзиники қилган. Ниҳоят тўртинчи мавсум уларга кўп нарсалар ваъда қилмоқда: биринчидан, «қаймоқранглилар» ЕЧЛни бу сафар эрта тарк этишди, иккинчидан «Барселона» чоракфиналдаги биринчи ўйинда, сафарда «МЮ»ни мағлуб этиб қайтганди. Бу каталонларнинг тарихда «Олд Траффорд»да илк марта ғалаба қозониши бўлди, қолаверса жамоа плей-оффда охирги 7 ўйинда биринчи ғалабага эришди. Энди «Камп Ноу»да инглизларга ортиқ имкон бермаслик талаб этиларди, холос.
Рэшфорднинг тўсинга теккан зарбаси
Сульшер жамоаси март ойида биринчи ўйиндаги мағлубиятдан қандай чиқиб кета олишини кўрсатиб улгурганди. «ПСЖ»га ўз уйида икки тўп фарқи билан мағлуб бўлган манчестерликлар Парижда рақибни яксон этганди ва ўзи билан ҳисоблашмаслик қандай оқибатларга олиб келишини кўрсатиб қўйганди. Каталониядаги ўйиннинг илк 10 дақиқалигида бунга ҳамма гувоҳ бўлди. «Барселона» футболчилари ташаббусни рақибга топшириб қўйишди - меҳмонлар майдон эгаларини майдоннинг иккинчи қисмига қамаб қўйишди, фаол равишда прессинг қилишди, рақибни хато қилишга мажбур қилиб, тўпни олиб қўйишди. Биринчи дақиқадаёқ Погба Рэшфордни қулай вазиятга чиқарди, аммо англиялик ёш ҳужумчининг зарбаси тер Штеген қўриқлаётган дарвоза тўсинига тегиб, майдон ташқарисига чиқиб кетди. «Барса»нинг яримфинал ўйинлари учун банд қилган чипталари хавф остида қолганди.
