Зеленский расман Украина президенти. У яқин вақт ичида қасамёд қилади

Украина Марказий сайлов комиссияси Владимир Зеленский президентлик сайловларида ғолиб бўлганини расман эълон қилди.

У 73,23 фоиз овоз олган ҳолда ғолиб чиққан. Амалдаги президент Петро Порошенкони сайловчиларнинг 24,45 фоизи қўллаб-қувватлаган. Сайловда давомат 61,37 фоизни ташкил этган - унда Украинанинг 18 миллион 491 минг 840 нафар фуқароси иштирок этган.

Зеленскийнинг инаугурация маросими кунини Олий Рада тасдиқлаши керак бўлади. Қонунга кўра, маросим сайлов натижалари расман эълон қилинганидан кейин 30 кундан кўп бўлмаган муддат ичида ўтказилиши керак. Бу ҳолатда қасамёд маросими энг узоғи 30 май куни бўлиб ўтиши керак.

Бундан аввалроқ, Зеленскийнинг жамоаси Петро Порошенкони жамоаси Украина конституциявий суди раиси Станислав Шевчукни истеъфога чиқариш орқали Владимир Зеленскийнинг инаугурациясини номаълум муддатга ортга суришга ҳаракат қилишда айблаганди.

Украина қонунчилигига кўра, янги сайланган президентга инаугурация вақтида ваколатларни конституциявий суд раиси топширади, бироқ маросим вақтида суд раиси бўлмаса зиддият юзага келиб, давлат раҳбари вазифасига киришиш номаълум муддатга, жумладан конституциявий судга янги раис сайлангунга қадар қолдирилиши мумкин.

Зеленскийнинг ўзи эса МСКни сайлов натижаларини эълон қилишни қасддан кечиктираётганини айтиб, бундан мақсад янги президент Олий Радани муддатидан аввал тарқатиб юборишининг олдини олиш эканини маълум қилганди. Украина қонунчилигига кўра, парламентни ваколати муддати тугашидан 6 ой олдин тарқатиб юбориш мумкин. Бу ҳолда охирги муддат 27 май бўлади. ОАВ маълумотига кўра, инаугурация маросими аввалдан 28 май кунига белгилаб қўйилган.

МСК президентнинг айбловини инкор қилди ва қонунга кўра, бюллетенларни тўлиқ ҳисоб-китоб қилиш учун комиссияга сайлов кунидан кейин 10 кун муддат берилганини рўкач қилди.

Украинада президентлик сайловларининг иккинчи тури 21 апрель куни ўтказилганди.