Бугун, 24 сентябрь куни, Тошкентдаги Халқаро савдо марказида ICTWEEK-2019 ҳафталиги олдидан матбуот анжумани ташкил этилди. Унда «Ўзбектелеком» АК, Huawei компанияси, Ахборот технологиялари ва коммуникацияларини ривожлантириш вазирлиги ва IT технопарки вакиллари иштирок этишди. Мутасаддилар ҳафталик доирасида бўлиб ўтадиган тадбирлар, танловлар, халқаро ҳамкорлик ва бошқа муҳим масалалар ҳақида маълумот беришди. Жумладан, 5G тармоғи борасида «Ўзбектелеком» АК тижорат директори в.б Алишер Зуфаров кенгроқ ахборот берди.
«Кўпчилик тармоқ фойдаланувчилари ҳали 5G тармоғига тайёр эмасликларини айтишмоқда, чунки бу тармоққа уланиш учун мос мобиль қурилма бўлиши керак. Аҳоли имкониятини ҳисобга олиб, кейин технологияни яхшилашга эътибор берсак, анча орқада қолиб кетишимиз мумкин. 14 сентябрда Тошкент универмагида тест режимида 5G’ни ишга туширдик. Энди эртага «Ўзэкспомарказ»да худди шу жараён ўтказилади. У ерда 5G тармоғига уланган смартфон, компьютерлар намойиш этилади. Бу тармоқни кенг фойдаланувчиларга тақдим қилишдан олдин қиладиган ишларимиз кўп. Энг аввало, малакали кадрларни тайёрлаш. Кейинги босқичларда 5G’ни аҳоли гавжум ҳудудларга ўрнатиш мўлжалланган. Шунингдек, қанча қурилма сотиб олишимиз кераклиги, қанча маблағ кетиши масалалари ҳам бор», дея Зуфаровнинг сўзларини келтирмоқда Kun.uz мухбири.
Унинг таъкидлашича, Ўзбекистонда 5G тармоғини ишга туширишга камида бир ёки бир ярим йил вақт кетади. Баъзан режалар амалиётдан фарқ қилади. Кўрсатилган муддат қисқариши ҳам мумкин.
