Ўзбекистондаги 1730та сайлов участкасида такрорий овоз бериш ўтказилмоқда

Бугун, 5 январь куни Ўзбекистонда депутатлик сайловларида такрорий овоз бериш ўтказилмоқда.

Олий Мажлис Қонунчилик палатаси аъзолиги учун сайлов 25 та округдаги 1730 та сайлов участкасида бўлиб ўтмоқда. Ушбу ҳудудларда сайловчилар сони 3 148 921 нафарни ташкил этади.

Унда партиялардан кўрсатилган номзодлар сони қуйидагича:

• ЎзЛиДеП – 15 нафар;
• «Миллий тикланиш» демократик партияси – 11 нафар;
• «Адолат» СДП – 10 нафар;
• ХДП – 9 нафар;
• Экопартия – 5 нафар.

Шунингдек, Халқ депутатлари вилоят кенгашларига сайлов ўтказувчи 95 та сайлов округидаги 1104 та сайлов участкасида ҳамда туман/шаҳар кенгашларига сайлов ўтказувчи 587 та сайлов округидаги 1117 та сайлов участкасида такрорий овоз бериш бўлиб ўтмоқда.

МСК ҳисоб-китобига кўра, маҳаллий даражадаги сайловларда 5 миллионга яқин сайловчи иштирок этиши мумкин.

«Сайлов ўтаётган ҳудудларда 5 мингдан зиёд кузатувчилар ишламоқда. Қонунчилик палатасидаги ўринлар учун курашаётган 50 нафар номзодларнинг 18 нафарини хотин-қизлар ташкил этади», – деди МСК раиси Мирзо-Улуғбек Абдусаломов.

Соат 11:20да бошланган матбуот анжуманида маълум қилинишича, бу вақтга қадар сайлов қонунчилигининг бузилишига оид хабарлар келиб тушмаган.