DW онлайн хронологиясида келтирилган маълумотларга кўра, 3 ноябр куни ўтган сайловлардан сўнг кўплаб штатларда овозларни санаш давом этмоқда. Манбадаги энг сўнгги дастлабки ҳисобда Сенатдаги умумий ўринлар бўйича демократларда 45 та, республикачиларда 36 та ўрин кўрсатилган. Қолган ўринлар бўйича ғолиблар ҳали аниқланмаган.
Энг кескин курашлардан бири Техасда кечмоқда. CNN маълумотига кўра, Сенат учун сайловда демократ Жеймс Таларико республикачи Кен Пакстондан анча олдинда бормоқда. Республикачилар штатнинг амалдаги губернатори Грег Эбботт ҳам қайта сайланиш учун курашда мағлуб бўлиши мумкинлигидан хавотирда. Бироқ қишлоқ ҳудудларидан келадиган натижалар партиянинг ортда қолишини қисқартириши кутилмоқда.
Жанубий Каролина, Оҳайо, Айова ва Канзас каби анъанавий консерватив штатларда ҳам республикачи номзодлар дастлабки ҳисобда демократлардан ортда қолмоқда. Небраскада эса республикачи номзод мустақил номзодга ютқазмоқда. Ушбу штатларда якуний ғолиблар ҳали белгиланмаган.
Associated Press агентлиги прогнозига кўра, демократ Рой Купер Шимолий Каролинада Сенат учун сайловда республикачи Майкл Уотли устидан ғалаба қозонади. Шу тариқа, демократлар бу сайловда илк бор республикачиларга тегишли сенаторлик ўрнини қўлга киритиши кутилмоқда. Купер сиёсатдан кетишини эълон қилган республикачи Том Тиллис ўрнини эгаллайди.
AP, шунингдек, Ню-Ҳэмпширда демократ Крис Паппас, Жоржияда Жон Оссофф ва Виржинияда Марк Уорнернинг ғалабасини прогноз қилмоқда. Демократлар Колорадо, Ню-Мексико, Делавэр, Иллинойс, Массачусетс, Ню-Жерси ва Род-Айленддаги Сенат сайловларида ҳам ғолиб чиқиши кутилмоқда.
Республикачилар эса Кентукки, Оклахома, Флорида, Ғарбий Виржиния ва Вайомингда Сенат ўринларини сақлаб қолиши прогноз қилинган. Жумладан, Кентуккида Энди Барр, Оклахомада Кевин Херн, Флоридада Эшли Муди ғалаба қозониши кутилмоқда.
Губернаторлик сайловларида ҳам дастлабки прогнозлар эълон қилинган. AP демократларнинг Массачусетс, Коннектикут, Род-Айленд, Ню-Йорк, Пенсилвания, Мэриленд, Иллинойс, Жоржия ва Колорадода — жами тўққиз штатда ғалаба қозонишини кутмоқда. Флорида ва Вайомингда эса республикачи номзодлар ғолиб чиқиши прогноз қилинган.
АҚШда оралиқ сайловлар президентнинг тўрт йиллик ваколат муддати ўртасида ўтказилади. Бу сафар сайловчилар Вакиллар палатасининг барча аъзолари, Сенатнинг учдан бир қисми, шунингдек, айрим штатлар губернаторлари ва маҳаллий ҳокимият вакилларини сайламоқда.
