Бугун, 21 февраль куни Самарқанд вилоят ҳокимлигида олтинчи чақириқ Халқ депутатлари Самарқанд вилояти Кенгашининг учинчи сессияси ўтказилди.
Kun.uz мухбирининг хабар беришича, сессия кун тартибида Самарқанд вилояти Маҳалла ва оилани қўллаб-қувватлаш бошқармаси бошлиғи ва бошлиқ ўринбосарларини тасдиқлаш тўғрисидаги масала ҳам кўриб чиқилди.
Ушбу масала юзасидан Ўзбекистон Республикаси президентининг маслаҳатчиси Рустам Қосимов чиқиш қилди.
Сессияда депутатлар томонидан янги ташкил этилган бошқармага қуйидаги таркибда бошлиқ ва унинг ўринбосарлари тасдиқланди:
Умаров Асқар Нарзиевич — вилоят ҳокимининг ўринбосари, маҳалла ва оилани қўллаб-қувватлаш бошқармаси бошлиғи;
Алимова Гавҳар Зойировна — маҳалла ва оилани қўллаб-қувватлаш бошқармаси бошлиғининг хотин-қизларнинг ижтимоий-сиёсий фаоллигини ошириш бўйича биринчи ўринбосари;
Халимов Акрам Ҳамидович — маҳалла ва оилани қўллаб-қувватлаш бошқармаси бошлиғининг хавфсиз маҳалла фаолиятини ташкил этиш ва мувофиқлаштириш бўйича ўринбосари;
Нормуродов Ҳасан Норбекович — маҳалла ва оилани қўллаб-қувватлаш бошқармаси бошлиғининг кексалар ва фахрийларни қўллаб-қувватлаш ва ижтимоий фаоллигини ошириш бўйича ўринбосари.
