Мексикада ёш боксчилар жамоаси автоҳалокатга учради

Мексика шимолида ёш боксчиларни олиб кетаётган автобус автоҳалокатга учради. Оқибатда 6 киши, жумладан 5 ёш боксчи ва уларнинг мураббийи воқеа жойида ҳалок бўлган.

Фото: Twitter @LARSAVISIONTV

Шунингдек, 25 киши жароҳат олган. Улар яқин орадаги шаҳарлар шифохоналарига етказилган. Бу ҳақда Televisa нашри хабар берди.

Воқеа 8 март соат 2.20да Бенжамин Хилл муниципал маркази яқинидаги шосседа юз берган.

13 ёшдан 17 ёшгача бўлган боксчиларни олиб кетаётган автобус мусобақалардан кейин Сьюдад-Обрегондан Пуэрто-Пеньяско томон йўналаётган бўлган.

Ҳуқуқ-тартибот идоралари фожиа сабабини тергов қилишни бошлашган. Дастлабки тахминга кўра, ҳайдовчи автобус бошқарувини қўлдан чиқарган. Бунинг натижасида у йўлдан чиқиб кетиб, ағдарилиб кетган.