Саудия Арабистони подшоҳи шифохонага ётқизилди

Саудия Арабистони подшоҳи Салмон ибн Абдулазиз ўт пуфаги яллиғланиши туфайли Ар-Риёддаги шифохонага ётқизилди.

AFP Photo/Bandar AL-JALOUD

Saudi Press Agency маълумотига кўра, айни вақтда 84 ёшда бўлган подшоҳ тиббий текширувдан ўтказилмоқда.

Салмон ибн Абдулазиз 1953 йилда, 18 ёшга тўлганида подшоҳ вакили ва Ар-Риёд амири этиб тайинланган. Орадан ўн йил ўтгач у Ар-Риёд вилояти губернаторига айланган ва 2011 йилга қадар ушбу лавозимда фаолият юритган.

2011 йилда Салмон бин Абдулазиз Ол-Сауд мудофаа вазири лавозимига тайинланган, шунингдек, Миллий хавфсизлик кенгаши таркибидан ўрин олган. Бир йилдан камроқ вақт ичида - 2012 йилнинг июнида у меросхўр шаҳзода ва бош вазир ўринбосарига айланган.

У 2015 йилнинг январида подшоҳ Абдулла вафот этгач, тахтга ўтирганди.

#Саудия Арабистони #Салмон ибн Абдулазиз