Испаниянинг «Реал» ва Португалиянинг «Порту» клуби собиқ дарвозабони Икер Касильяс «твиттер»даги саҳифаси орқали профессионал футболчилик фаолиятини якунлашини эълон қилди.

«Ўйлайманки, ўтган йиллар давомидаги футболчилик фаолиятимга фақат ҳавас билан қараш мумкин», - дея ёзади Икер.

Испаниялик 39 ёшли дарвозабоннинг фаолиятини якунлаши ҳақида 2019 йилнинг декабрь ойида хабар қилинган эди. Бунгача у «Порту» сафидаги машғулотлар пайтида юрак хуружини бошдан кечирганди. 

Жорий йил бошида Икер Касильяс Испания футбол федерацияси президентлиги учун сайловларда ўз номзодини қўйишини маълум қилган бўлса-да, якунда бу фикридан қайтганди. Маълумотларга кўра, Касильяс тез орада «Реал»га қайтиб, клуб президенти Флорентино Пересга маслаҳатчи сифатида иш бошлайди.

  • Касильяс футболчилик фаолиятининг асосий қисмини Мадриднинг «Реал» клубида ўтказган, 2015 йилда «Порту» сафига ўтганди.
  • Касильяс — футбол тарихидаги энг совриндор дарвозабонлардан бири ҳисобланади. Испания терма жамоаси билан у 2010 йилги жаҳон чемпионатида ҳамда икки марта Европа чемпионатида (2008 ва 2012 йиллар) ғолиб чиққан. «Реал» таркибида Касильяс уч марта Чемпионлар лигаси ғолиби ва 5 марта Испания чемпионати чемпиони бўлган. «Порту» билан эса икки бор Португалия чемпионига айланган.
  • Касильяс беш марта Халқаро футбол федерацияси тарихи ва статистикаси версияси бўйича жаҳоннинг энг яхши дарвозабони сифатида тан олинган. Бу рекорд: италиялик дарвозабон Жанлуиджи Буффонда ҳам шундай натижа.