NASA’нинг Swift космик телескопи учирилганидан 22 йил ўтиб, 4 ноябрь куни бошқарувсиз ҳолатда Ерга қулаб тушди. Бу ҳақда Antena 3 CNN хабар берди.
Қайд этилишича, 1450 килограмм вазнга эга телескоп Гринвич вақти билан соат 12:39 да Суматра оролининг шимолий қисми устидан Ер атмосферасига кирган. Нашрнинг эслатишича, телескоп 2004 йилнинг ноябрь ойида икки йил давомида коинотдаги энг кучли портлашлар — гамма-чақнашларни ўрганиш вазифаси билан Ер орбитасига олиб чиқилган эди.
Swift фақат гамма-портлашларни кузатиш билангина чекланиб қолмади. У бошқа кўплаб космик объектлар ва ҳодисаларни ҳам ўрганди: олисдаги ўта янги юлдузларнинг портлаши ва моддаларни ўзига ютаётган қора туйнуклардан тортиб, Қуёш тизимидаги астероид ҳамда кометаларгача.
Телескоп ўзининг мўлжалланган хизмат муддати тугаганидан кейин ҳам яна узоқ вақт ишлашда давом этди. Космик телескоп ўзининг сўнгги илмий кузатувини шу йилнинг 20 октябрь куни амалга оширган.
Нашрнинг қўшимча қилишича, Swift миссияси ўта самарали кечган: ўзининг узоқ йиллик илмий фаолияти давомида у 2 мингдан ортиқ гамма-чақнаш ва 1 400 та янги юлдузни қайд этган. Агар NASA’нинг қутқарув операцияси муваффақиятли якунланганида, телескоп бундан-да кўпроқ маълумот тўплаши мумкин эди.
NASA 2025 йилнинг сентябрь ойида Katalyst Space компанияси билан роботлаштирилган космик аппаратни лойиҳалаш, учириш ва ундан фойдаланиш бўйича 30 миллион долларлик шартнома имзолаган эди. Аппарат телескоп билан туташиши ва уни юқорироқ орбитага олиб чиқиб, ишлаш муддатини узайтириши керак эди.
Swift аста-секин Ерга қараб пасайиб борди. Уни Ерга тортаётган атмосфера қаршилигини енгиш учун ўз двигателлари мавжуд эмасди. Swift баландликни йўқотгани сайин жараён тезлашди ва Katalyst компанияси зудлик билан ҳаракат қилишига тўғри келди. 3 июль куни LINK миссияси — август ойида Swift’ни тутиб олишга мўлжалланган, учта роботлаштирилган манипуляторга эга музлаткич катталигидаги техник хизмат кўрсатиш аппарати учирилди.
Бироқ, нашрнинг таъкидлашича, LINK аппаратининг двигателлар тизими ва фазода йўналишни сақлаш тизимида муаммолар юзага келгани сабабли бу режа амалга ошмади.
