Буюк Британияда коронавирус сабабли янги чекловлар жорий этилди

Ўтган суткада Буюк Британияда 4368 кишида коронавирус аниқланган, 11 киши вафот этган.

Фото: kommersant.uk

Буюк Британия бош вазири Борис Жонсон коронавируснинг иккинчи тўлқини сабабли мамлакатда янги чекловлар жорий этилганини эълон қилди.

Унинг сўзларига кўра, аҳолининг 8 фоиздан камроқ қисми коронавирусга қарши антитанага эга, касаллик қайд этилиши ҳолатларининг ўсиши эса фақат тест олиш ҳажмининг ошишигагина боғлиқ эмас.

"Куздан қишга ўтгунимизга қадар коронавирус юқори суръатларда тарқалади. Шунинг учун ҳозирдан ҳаракат қилишимиз керак", - деди Жонсон.

"Биз уйдан ишлай оладиганларни уйда қолишга чақирамиз", - деди у, ҳукумат ўтган ҳафтада одамларни офисларга қайтишга чақираётганди.

Англияда ресторанлар кеч соат 10да ёпилади. Барча дўконлар ва ресторанлар ходимлари ниқоб тақиши шарт бўлади.

Жонсон аҳолини турли учрашув ва тадбирлар ўтказишни тўхтатишга чақиради. Тўйларда иштирок этадиган меҳмонлар сони 30дан 15 нафарга камайтирилди.

Ўтган суткада Буюк Британияда 4368 кишида коронавирус аниқланган, 11 киши вафот этган. Мамлакатда коронавирус юқтирганларнинг умумий сони 398 минг 625 нафарга етган, 41 минг 788 киши вафот этган.