DW хабарига кўра, Бёрнем 11 октябр куни X ижтимоий тармоғида бу ҳақда баёнот берган. У Россия дам олиш кунлари Украина энергетика инфратузилмасига зарбаларни кучайтирганини билдирган.
«Бу украиналик тинч аҳолига ҳужум бўлиб, уларни совуқ ва қоронғиликда қолдирмоқда», — деб ёзган Британия бош вазири.
Бёрнемнинг маълум қилишича, у 10 октябр куни Украина президенти Володимир Зеленский билан «энергетик сулҳ» масаласини муҳокама қилган. Унинг фикрича, бундай келишув жаҳон бозорларига энергия ва ёнилғи етказиб беришни тиклашнинг энг мақбул йўлидир.
АҚШ президенти Доналд Трамп 11 октябрда Россия ва Украина энергетика объектларига зарбаларни тўхтатишга рози бўлганини эълон қилган эди.
«Шу пайтдан бошлаб Россия ва Украина ўртасидаги урушда энергетик сулҳ жорий этилади. Ҳар икки томон бунга розилик берди. Уни бузманг!» — деб ёзган у Truth Social’да.
Бироқ Зеленский дастлаб Axios журналистига бундай қисман сулҳга эришилганидан хабари йўқлигини айтган. У Россия ҳам рози бўлса, ташаббусни қўллаб-қувватлашини билдирган.
Кейинроқ Украина президенти Киев Америка томонидан аниқ тафсилотларни кутаётганини маълум қилган.
«Украина Қуролли кучлари барча буйруқларни олди. Ҳамкорларимизнинг бизга ёрдам бериши мумкин бўлган барча қадамларини қўллаб-қувватлаймиз. Американинг Россия билан мулоқотига оид аниқ тафсилотларни ва Путин президент Трамп айтган гапларни бажаришини кутяпмиз», — деган Зеленский.
AFP хабар беришича, мақола эълон қилинган пайтда Кремль бу масала юзасидан изоҳ бермаган.
Агентлик АҚШда 3 ноябр куни Конгресс сайловлари ўтказилишини ҳам эслатган. Яшаш харажатлари, хусусан, ёнилғи нархларининг юқорилиги сайловлар олдидан Республикачилар партиясига босимни кучайтирмоқда.
