Британиянинг Донкастер шаҳридаги ёввойи табиат боғида Олтой лақабли Амур йўлбарси вольерга кириб олган эркакни ғажиб ташлади. Ҳодиса 10 октябрь куни юз берган эди.
Уч кундан сўнг, 13 октябрь куни АҚШ президенти Доналд Трамп Truth Social ижтимоий тармоғида йўлбарснинг ҳужуми акс этган кадрларни улашиб, постга «Табиат билан асло ўйнашманг!» деган изоҳ қолдирди.
Кейинроқ у сунъий интеллект ёрдамида яратилган бошқа бир роликни жойлаштирди. Унда Трампнинг ўзи майсазорда йўлбарс билан думалаб ўйнаётгани, сўнг уни қучоқлаб олгани акс этган.
Марҳумнинг қариндошлари бунга кескин муносабат билдирди. Улар ижтимоий тармоқларда «ўта ҳақоратомуз контент»нинг тарқатилиши ўзига оғир ботаётганини таъкидлади. Оила аъзолари бундай материалларни ёйишни тўхтатишни сўради. Шунингдек, полиция ҳам ҳужум тасвирланган видеони тарқатмасликка чақирди.
Ҳалок бўлган британиялик Уилям Чапман 23 ёшда эди. Яқинларининг сўзларига кўра, у самимий, меҳрибон ва очиқкўнгил йигит бўлган. У кўп йиллардан буён оғир руҳий хасталикдан даволаниб, кучли таъсир қилувчи дори-дармонларни қабул қилиб келган.
The Guardian нашрининг ёзишича, фожиа юз берган боғ томошабинлар учун ёпиқлигича қолмоқда. Маъмурият одамга ҳужум қилган йўлбарс ўлдирилмаслигини маълум қилди.
