Жорий йилнинг 5 октябрь куни «Жиззах» эркин иқтисодий зонасида «Оптик толали алоқа кабелларини ишлаб чиқаришни ташкиллаштириш» лойиҳаси доирасида «Global Optical Communication Uzbekistan» («GOC-UZ») МЧЖ Қўшма корхонасининг янги ишлаб чиқариш ҳудудида пойдевор қўйиш маросими бўлиб ўтди.

Тадбирда Ахборот технологиялари ва коммуникацияларини ривожлантириш вазири ўринбосари Махсудов Жамол Тиллоевич, «Global Optical Communication Uzbekistan» МЧЖ ҚК Бош директори Ик Чжун Янг, Жиззах вилояти ҳокимининг ўринбосари Акрам Раҳмонқулов, «Жиззах» ЭИЗ вакиллари, «GOC-UZ» ҚК хорижий инвесторлари, «Ўзбектелеком» АК вакиллари, «GOC-UZ» ҚК раҳбарияти ва ходимлари, қурилиш ташкилоти раҳбарияти ва ходимлари, оммавий ахборот воситалари вакиллари иштирок этдилар.

Оптик толали кабеллар ишлаб чиқаришга ихтисослашган «Global Optical Communication Uzbekistan» МЧЖ Қўшма корхонасига 2019 йил асос солинган. Ишлаб чиқарувчи корхона «Жиззах» ЭИЗда «Ўзбектелеком» АК ва Жанубий Кореянинг хорижий инвесторлари: «Global Optical Communication Co. Ltd.» ва «Uni Asset Global Co. Ltd.» компаниялари билан биргаликда ташкил этилган. Ишлаб чиқариш қуввати йилига 50 минг км гача оптик толали алоқа кабелларини ташкил этади. 

Қўшма корхонанинг устав капитали 11 миллион АҚШ долларини ташкил этади, шу жумладан:

  • Жанубий Кореянинг компаниялари (55%) – 6.050.000 АҚШ доллари (ишлаб чиқариш ускуналари, материаллар, айланма маблағлар);
  • «Ўзбектелеком» АК (45%) – 4.950.000 АҚШ доллари (бино ва иншоотлар).

2020 йилда биринчи босқичда «Global Optical Communication Uzbekistan» ҚКнинг «Жиззах» ЭИЗдаги мавжуд биносида Корея, Япония ва Хитой компанияларининг замонавий ускуналари ўрнатилган бўлиб, тайёр маҳсулотлар ишлаб чиқарилмоқда ва ҳозирги кунда ушбу заводда кореялик мутахассислар фаолият юритмоқдалар. Бунинг самарасини қисқа муддат ичида ишга тушириш ва созлаш ишлари амалга оширилгани ва Оптик толали кабелларни Корея технологияси асосида ишлаб чиқариш ўзлаштирилганини яққол кўришимиз мумкин.

Мавжуд ишлаб чиқариш қувватларида 2020 йилда корхона 10 минг км узунликдаги оптик толали алоқа кабелларини ишлаб чиқаради. Янги қўшма корхона бугунги кунда 58 та янги иш ўрни яратди.