DW нашрининг хабар беришича, Марказий сайлов комиссияси 4 октябр, якшанба куни кечқурун овоз беришнинг дастлабки натижаларини эълон қилган. Сайловчилар мамлакат президиуми аъзолари, марказий ва икки минтақавий парламент депутатлари, шунингдек, Серб Республикаси президентини танлаган.
Бюллетенларнинг 95 фоизи санаб чиқилган пайтда президиумда босниялик мусулмонлар — босняклар вакили бўлиш учун курашда Денис Бечирович қарийб 38 фоиз овоз билан етакчилик қилган. У бунга қадар президиум раиси лавозимида фаолият юритган.
Хорватлар вакили учун сайловда Дарияна Филипович тахминан 48 фоиз овоз билан олдинда бўлган. Серблар вакили сифатида эса амалдаги президиум аъзоси Желка Цвиянович қарийб 55 фоиз овоз тўплаган.
Босния ва Ҳерцеговинада давлат раҳбари вазифасини уч кишидан иборат президиум бажаради. Унда босняклар, хорватлар ва серблар биттадан вакилга эга. Бу бошқарув тизими мамлакатдаги фуқаролик урушига нуқта қўйган 1995 йилги Дейтон келишувлари асосида шаклланган.
Сайловдаги асосий рақобатлардан бири Босния ва Ҳерцеговина таркибидаги, аҳолисининг асосий қисмини серблар ташкил этувчи Серб Республикаси президентлиги учун кечган. Унда минтақа бош вазири Саво Минич ва мухолифат номзоди Бранко Блануша беллашган.
Дастлабки натижаларга кўра, Минич аксарият сайлов округларида рақибидан ўзиб кетган. Блануша айрим округларда устун келган бўлса-да, Марказий сайлов комиссияси маълумотлари умумий ҳисобда Минич олдинда эканини кўрсатган.
Минич ҳам, Цвиянович ҳам Милорад Додик асос солган «Мустақил социал-демократлар иттифоқи» партиясидан номзод бўлган. Мазкур партия Серб Республикаси парламенти — Халқ скупштинаси сайловида ҳам етакчилик қилмоқда. Мамлакат парламентининг қуйи палатасига сайловда ҳам босниялик сербларнинг аксарияти шу партияни қўллаб-қувватлаган.
Додик Минич ва Цвияновични ғалаба билан табриклашга улгурган. Нашрнинг қайд этишича, Додик 2025 йилда Босния ва Ҳерцеговина Конституциявий суди қарорлари ҳамда халқаро келишувларни бажармагани учун президентлик лавозимидан мажбуран четлаштирилган. Суд унга олти йил давомида сиёсий фаолият билан шуғулланишни ҳам тақиқлаган.
Россияга яқинлиги билан танилган Додик суд қарорини тан олмаган ва қўллаб-қувватлаш излаб Москвага борган. У Саво Минич билан бирга 29 сентябр куни Кремлда Владимир Путин билан учрашган.
