Ҳозирда боши берк кўчага кириб қолган ва аукционда харид қилган еридан ҳам, суднинг ҳал қилув қарори боис ушбу ер учун ўринга ўрин берилган ер майдонидан ҳам қуруқ қолган 3 нафар тадбиркордан бири – Шарофиддин Даминов бўлади.
«2018 йил 31 октябрда e-auksion сайти орқали Қарши шаҳридан ўтувчи Қарши–Шаҳрисабз йўл ёқасига яқин жойдан, Отчопар маҳалласидан 3,6 сотих ер майдони харид қилган эдим. Ўша йилнинг 21 декабрида ҳокимнинг ўша қатордаги барча ер майдонлари учун битта қарори чиққан.
Қурилиш учун лойиҳа-смета ҳужжатларини йиғишни бошлаганимдан бироз ўтгач, бу ишларни тўхтатиб туришимни ва ерни ўз хоҳишим билан захирага топширишим кераклигини айтишди. Ҳокимлик вакили мен харид қилган ерда йирик мултиавтосалон қурилиши белгиланганини, мени еримга ўринга ўрин ер майдони берилишини айтди. Бу воқеа 2019 йилнинг июл ойида бўлди. Ўрнига ўрин ер берсангиз, мен розиман, дея ариза ёзиб бердим. Захирага олинди», – дейди Шарофиддин Даминов.
Тадбиркорнинг айтишича, унга 3та ер участкаси кўрсатилган, у ўзига шаҳарнинг «Рогузар» МФЙ, Ислом Каримов кўчасидан 4,8 сотих ер майдони маъқул келганини билдирган ҳамда ҳеч кимда эгалик ҳуқуқи бўлмаса, ушбу ерни беришларини сўраган.
«2019 йил 9 июлда шу жойга қарор чиқариб беришди. Қарорга ҳеч қандай эътирозим йўқ эди. Оилавий масалалар боис ишим сал орқага сурилди. Кейинчалик, архитектура-қурилиш хулосасини олиш учун ҳужжатларни топширдим. Хулосани олиб бўлгач, лойиҳага топширган вақтларим бошқа бир киши келиб, бу жойни ўраб олибди.
Маълум бўлишича, ҳокимлик «Асл Меъмор Барака» МЧЖга 2020 йил 3 апрел куни айни ерга қарор чиқариб берган», – дейди у.
Ш.Даминов бир неча марта шаҳар ҳокимлигига боргани, манфаатларига зид ҳокимлик қарорини бекор қилдириш учун Қарши шаҳар маъмурий судига мурожаат қилганини билдирди.
