3 декабр куни Халқаро пресс-клубда «Ўзбекистон Республикасининг Конституцияси ва қонунчилигида сўз ҳамда матбуот эркинлиги ва Ўзбекистонда ОАВни ривожлантириш жараёнлари» мавзусида давра суҳбати бўлиб ўтди. Тадбир якунида АОКА раҳбари Асаджон Ходжаев журналистларни қизиқтирган айрим саволларга жавоб берди ва баъзи масалалар юзасидан ўз фикрларини билдирди.
Таҳлилий мақолалар ва мавзулар камлиги хусусида
«Бизнинг журналистларга, ОАВга таҳлилий мақолалар етишмайди. Мен ҳар доим таҳлил тарафдориман. Нимага? Ҳар қандай муаммонинг объектив ва субъектив сабаби бор. Буларни биз очиқ-ойдин муҳокама қилишимиз керак. Эҳтиросга берилиб, раҳбарларни бирор муаммони тез ҳал қилиб беринглар дейиш билан нимага ундаймиз, улар ҳисоб-китоб қилмасдан, эртага ҳал қиламиз, дегандек, халққа яхши кўриниш учун популистик ваъдаларни бериб юборади. Йўқ, халқнинг муаммоларини очиқ-ойдин кўрсатиб беришимиз керак. Имконият бўлмаса, уни айтиши, захиралар шу ишларга етади, деб аниқ билдириши, турли олибқочар сўзлар билан вазиятни тинчитиш бўлмайди. Муаммони таҳлил асосида ҳал қилишимиз керак».
Ходжаев АОКА томонидан Gazeta.uz сайтига берилган тақдимномани ҳам изоҳлади
«Бу масалада, авваламбор, маълумотларни текшириш ҳақида гапирдик. Соғлиқни сақлаш вазирлигининг изоҳини олиш керак эди. Лекин вазирлик фикри олинмасдан эълон қилинган. Ахборотни биринчи текшириш керак. Интернетда, ижтимоий тармоқларда турли ахборот тарқалади. Уларнинг ҳаққонийлигини текширишни биз талаб қила олмаймиз, бунга ҳақимиз ҳам йўқ. Лекин ҳар қандай ОАВ ўша ахборотни текшириши, сўнг тегишли ахборот хизматидан сўраши керак деб ҳисобладим. Мабодо, изоҳ ололмаса, менга чиқиши лозим бўлади».
АОКА журналистлар ва ОАВни ҳимоя қилишни давом эттиради
«Сиёсат ўзгармайди, буни ҳаммамиз билишимиз керак. АОКА бундан кейин ҳам журналистларни ва ОАВни ҳимоя қилишни давом эттиради. Менинг фикрим, журналист ёзгани учун қамоқда ўтириши керак эмас. Бу менинг позициям, бу йўналишда ишлайман ва ишларни давом эттираман».
Мулоқотдан қочадиган вазирлик ва ҳокимликлар ҳақида
«Шу йилнинг ўзида журналистларнинг ахборот олиш ҳуқуқи поймол қилинганини инобатга олиб, турли идораларга 37та тақдимнома ва кўрсатма киритдик. Кўп мулоқотдан қочадиган идоралар Бандлик ва меҳнат муносабатлари вазирлиги, Соғлиқни сақлаш вазирлиги ҳамда Тошкент шаҳар ҳокимлиги бўлди. Биз бу идораларга киритган тақдимномалар бўйича тегишли жавобни оламиз ва ишни охирига етказамиз».
