Street View — кўчани худди ўша ерда тургандай томоша қилиш имконини берадиган хизмат. Унда Google одамларнинг юзлари ва автомобилларнинг давлат рақамларини автоматик равишда хиралаштиради. Мақсад — тасвирга тасодифан тушиб қолган одамларни таниб олишни қийинлаштириш ва уларнинг шахсий ҳаётини ҳимоя қилиш.
Хиралаштиришда суратнинг танланган қисмидаги майда тафсилотлар ноаниқ қилинади. Натижада юзни таниш, рақамни ўқиш ёки уйнинг ташқи кўринишини батафсил кўриш қийинлашади. Агар автоматик тизим юз ёки рақамни очиқ қолдирган бўлса, фойдаланувчи бу ҳақда Google’га хабар бериши мумкин.
Уй тасвирини хиралаштириш ҳам мумкин. Айрим одамлар бегона кишилар интернет орқали уйини синчиклаб кўришини истамайди ва компанияга мурожаат қилади. Шунинг учун харитадаги хиралаштирилган бино оддий хонадон бўлиши ҳам мумкин.
Сунъий йўлдош ёки самолётдан олинган тасвирларда эса тартиб бошқача. Google расмий маълумотига кўра, компания бундай суратларни ўзи хиралаштирмайди. Давлат идораси бирор ҳудудни яширишни сўраса, Google мурожаатни тасвирларни етказиб берувчи компанияга юбориш кераклигини айтади. Демак, юқоридан олинган суратдаги ҳар бир беркитилган жойни Google ходимлари қўлда яширган, деб ҳисоблаш тўғри эмас.
Уйининг Street View тасвирини хиралаштиришни унинг эгаси ёки ижарачиси сўраши мумкин. Google бунинг учун тегишли манзилда яшаш ёки уйга эгалик қилишни тасдиқловчи ҳужжат талаб қилади.
Сўров юбориш тартиби қуйидагича:
Google Maps’дан уйингизни топиб, унинг Street View тасвирини очинг.
Тасвирнинг пастки ўнг бурчагидаги «Муаммо ҳақида хабар бериш» — Report a problem ҳаволасини босинг. Бу бўлим юқори чап бурчакдаги уч нуқтали менюда ҳам бўлиши мумкин.
Тасвирда хиралаштирилиши керак бўлган уйни белгиланг ва «Менинг уйим» — My home вариантини танланг.
Бундай сўров бериш ҳуқуқингиз борлигини тасдиқлаб, манзилни киритинг ва уни тасдиқловчи ҳужжатни юкланг.
Шаклдаги бошқа майдонларни, жумладан электрон почта манзилини тўлдиринг, reCAPTCHA текширувидан ўтинг ва сўровни юборинг.
Манзилни тасдиқлаш учун, масалан, яқиндаги коммунал тўлов ҳужжати ёки ижара шартномасидан фойдаланиш мумкин. Google ҳужжатда манзил ва санани қолдириб, исм, ҳисоб рақамлари ва бошқа шахсий маълумотларни беркитишни сўрайди. Паспорт каби давлат берган шахсни тасдиқловчи ҳужжатлар бу мақсадда қабул қилинмайди.
