ЖССТ вакили коронавирусга қарши мажбурий эмлашга қарши чиқди

Одамларни коронавирусга қарши мажбурий эмлашдан кўра уларни бундай эмлаш фойдали эканига ишонтириш нафлироқ бўлади. Бундай фикрни ЖССТнинг эмлаш бўйича бўлими директори Кэтрин О'Брайан айтиб ўтди.

“Талаб қилиш ҳаракатланишимиз керак бўлган йўналиш деб ўйламайман, айниқса ушбу вакциналар хусусида”, деб айтган О'Брайан.

ЖCCТ вакилининг фикрича, дунёдаги бирорта давлат ҳукумати коронавирусга қарши мажбурий эмлашни ўтказиши даргумон. Шу билан бирга унинг таъкидлашича, муайян касбда ишловчи одамлардан, мисол учун, интенсив даволаш бўлимидаги тиббий ходимлардан ўзларининг ва беморларнинг хавфсизлигини таъминлаш учун эмланиш талаб қилиниши мумкин.

Бироқ ЖССТда тан олинишича, аҳолини коронавирусга қарши эмланишга кўндириш қийин иш бўлади.

“Биз одамларни вакциналарнинг фойдали эканига ишонтиришимиз ва уларни бунга кўндиришимиз лозим”, деб айтган ЖССТ вакили Майкл Райан.

У ҳам мажбурий эмлашга қарши чиққан ва одамларга зарур ахборотни тақдим қилиб, уларга эмланиш ёки эмланмасликни ўзлари ҳал қилишларига имкон бериш мақбул вариант бўлишини айтган.

“Аминманки, эмланиш ягона масъулиятли қадам бўладиган муайян вазиятлар бор”, деб қўшимча қилган Райан.