Коронавирус сабабли Токиода фавқулодда ҳолат режими жорий этилди

Фавқулодда ҳолат режими 8 январдан 7 февралгача давом этади.

Фото: Reuters

Коронавирус юқтириш ҳолатлари кўпайганлиги сабабли Япония бош вазири Ёсихидэ Суга Токио ва унинг атрофидаги шаҳарларда фавқулодда ҳолат режимини жорий этди.

Kyodo News нашрининг хабар беришича, пойтахтда ўтган суткада коронавирус юқтириш билан боғлиқ 2447та янги ҳолат қайд этилган. Бу аввалги антирекорддан 800тага кўпдир.

Хабар қилинишича, фавқулодда ҳолат режими 8 январдан 7 февралгача давом этади.

Токио аҳолисидан бу вақт давомида уйда қолиш ва буюмларни интернет орқали сотиб олиш сўралмоқда. Ресторан ва барлар кеч соат саккизгача ишлайди. Дўконлар, кўнгилочар ва спорт масканларининг иш вақти ҳам қисқартирилади. Компанияларга масофадан ишлашга ўтиш тавсия қилинмоқда.

Мактаблар фаолият кўрсатишда давом этади. Университетларда ҳам имтиҳонлар бекор қилинмаган.

Чекловларга амал қилмаганлар жаримага тортилмайди, балки омма олдида изза қилинади, деб ёзмоқда Kyodo. Ҳукуматнинг барча талабларига риоя қилган умумий овқатланиш муассасаларига суткасига 40 минг иендан (390 доллар) 60 минг иенгача компенсация тўланади.

Ўтган суткада Япония бўйича 6004 нафар бемор аниқланган. Мамлакатда пандемиянинг учинчи тўлқини бошланган деб ҳисобланмоқда.

#Япония #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.