Жорий йил 1 февралдан бошлаб барча турдаги (талаба, ўқувчи, нафақа ҳамда аҳоли учун мўлжалланган) қоғоз кўринишидаги ойлик йўл чипталари сотувга чиқарилмайди. Бу ҳақда «Тошшаҳартрансхизмат» матбуот хизмати хабар берди.
Тошкент жамоат транспортида автоматлаштирилган тўлов тизими жорий этилиши муносабати билан 2021 йил 1 февралдан қоғоз кўринишидаги ойлик йўл чипталаридан фойдаланилмайди. Шу санадан бошлаб имтиёзли электрон ойлик йўл чипталари учун белгиланган кунлик тарифлар фаоллаштирилади. Шунингдек, электрон ойлик йўл чипталарини биринчи бор харид қилаётган йўловчиларнинг транспорт карталарида 30 кунлик тариф автоматик тарзда ёқилади.
«Тошшаҳартрансхизмат» матбуот хизмати котиби Азимжон Маҳамаджоновнинг Kun.uz мухбирига маълум қилишича, сотиб олинган электрон ойлик йўл чипталаридаги тарифлар биринчи тўловни амалга оширган кундан бошлаб, тарифда белгиланган кунга қадар амал қилади.
«Масалан, йўловчи тарифни ойнинг 1-санасидан сотиб олди, аммо 8-санадан фойдалана бошлади. Шунда тариф кейинги ойнинг 8-санасига қадар амалда бўлади», - деди у.
Имтиёзли (N, T, O‘, NM, TM, O‘M) транспорт карталарини Тошкент шаҳридаги 70та ойлик йўл чипталари ва транспорт карталари сотиш шохобчаларидан харид қилиш мумкин.
Шунингдек, талаба, ижтимоий нафақа, ўқувчи туридаги уч хил электрон ойлик йўл чипталарига эга бўлиш учун қуйидаги ҳужжатларни тақдим этиш лозим бўлади:
- талабанинг электрон ойлик йўл чиптаси учун паспорт нусхаси ҳамда муассаса томонидан тақдим этилган гувоҳнома;
- ижтимоий электрон ойлик йўл чиптаси учун паспорт нусхаси ҳамда нафақага чиққанлиги ҳақида ҳужжат;
- ўқувчининг электрон ойлик йўл чиптаси учун, ушбу ўқувчи ота-онасининг паспорт нусхаси ҳамда ўқувчининг туғилганлиги ҳақида гувоҳнома.
Барча турдаги электрон транспорт карталаридан 3 йил муддатда фойдаланиш мумкин. Энди ҳар ойда янги электрон ойлик йўл чипталари харид қилиш лозим бўлмайди. Қулай тарифларни юклаб олиш кифоя бўлади. Шунда карта бепул тақдим этилади.
