16 йил ичида ЕЧЛ чорак финалида илк бор Месси ва Роналду ўйнамайди. Лекин Мбаппе ва Ҳоланд бўлади

Чемпионлар лигаси. 1/8 финал. Жавоб ўйини
«ПСЖ» (Франция) — «Барселона» (Испания) — 1:1 (1:1)
Голлар: Мбаппе, 31 — пенальтидан (1:0). Месси, 37 (1:1).
Аниқ ижро этилмаган пенальти: Месси, 45+3 (дарвозабон).
«ПСЖ»: Навас, Курзава (Диалло, 46), Флоренци (Дагба, 76), Маркиньюс, Кимпембе, Гейе (Данилу Перейра, 59), Дракслер (Ди Мария, 59), Верратти (Рафинья, 84), Паредес, Икарди, Мбаппе.
«Барселона»: тер Штеген, Жорди Альба, Лангле, Мингеса (Фирпо, 35), Дест (Тринкан, 66), Бускетс (Пьянич, 79), де Йонг, Месси, Гризманн, Дембеле (Мориба, 79), Педри (Брэйтуэйт, 79).
Огоҳлантиришлар: Курзава, 8. Мингеса, 25. Лангле, 30. де Йонг, 38. Гейе, 50. Паредес, 50. Икарди, 89.
Ҳакам: Энтони Тэйлор (Англия).
10 март. Париж. «Парк де Пренс» стадиони.
Биринчи ўйин — 4:1.

«Камп Ноу»даги 4:1 ҳисобидан кейин «ПСЖ» мухлислари хотиржам бўлиши керакдек эди. Аммо уларнинг хотирасидан ҳали ўша 1:6 ҳисоби ўчмаган, фанатларда тўрт йил ўтиб ҳам «Барселона»га ўша ўйин ҳаками Дениз Айтекиннинг айрим қарорлари туфайли эътирозлар бор. Натижада парижлик мухлислар «Парк де Пренс»даги учрашувга ҳали ҳеч нарса ҳал қилинмагандек тайёргарлик кўришди. Каталонияликлар жамоаси тунаган меҳмонхона яқинида тун бўйи мушакбозлик қилинди, тонгга яқин фанатлардан бири меҳмонхонанинг ёнғинга қарши сигнализациясини ёқиб юборди, уни тезда полиция қўлга олди.

Бундай тайёргарликдан кейин ўйин ҳам зерикарли бўлмаслиги тайин эди. Айнан биринчи ўйиндаги фиаскодан кейин «Барселона» бош мураббийи Роналд Куман уч нафар марказий ҳимоячи схемасига ўтди. Бу Испания Кубоги ярим финалида «Севилья»га қарши кечган ўйинда (0:2дан кейин 3:0 ва финал) ўзини оқлади, шундан кейин кўк-анорранглилар нисбатан кучсизроқ рақибга («Осасуна» билан 2:0) қарши ҳам шу тактикани қўллади.

Аммо парижликларга қарши ўйин учун таркибга футболчиларни танлашда асосий эътибор ҳужумга қаратилмаганди. Пикенинг жароҳати туфайли де Йонг ҳимояда ўйнашга мажбур бўлмоқда - ундан ташқари ҳимоя марказида тез-тез «қовун туширувчи» Клеман Лангле ва ёш Оскар Мингеса туширилди. Нидерландиялик футболчи ҳужумга ўтиш вақтида анча олдинга чиқмоқда ва майдон марказида Бускетс билан бир хил вазифа бажармоқда. Натижада майдонда анча бўшашган ва хотиржамликка берилган «ПСЖ» фонида каталонияликлар анча қизиқроқ кўринишди.

Меҳмонлар жуда ўзгача ўйин намойиш этишмагандек, аммо танаффусгача таблода 1:3 ҳисоби ёниб турганида ҳам ҳеч ким ҳайрон қолмаган бўларди. Бу шунчаки жуда қулай вазиятлардан келиб чиқиб айтилганда. Ўйинда узоқдан берилган чиройли зарбаси билан Чемпионлар лигасидаги 120-голини урган Месси биринчи бўлимга қўшиб берилган дақиқаларда пенальтини аниқ ижро эта олмади. Бу мавсумда турнирда тўрт бор 11 метрлик зарбадан гол урган аргентиналикнинг бу сафарги зарбаси Кейлор Наваснинг оёқларидан дарвоза тўсинига бориб қайтди.

Яна бир вазиятда дарвоза тўсини Дестнинг зарбасидан кейин мезбонларни қутқарди, бундан ташқари, Дембеле кўп марта парижликлар ҳимоясидаги тартибсизликлардан фойдалана олмади - парижликлар кўплаб узун узатмаларни ўтказиб юборишди ва агар Дембеленинг омади келганида, танаффусга қадар ҳам ҳет-трик қайд этган бўларди. Маурисио Почеттино жамоаси дарвозасига йўлланган 16 аниқ зарбадан 4таси ушбу француз ҳужумчига тегишли бўлди.

Қолаверса, «Барса»нинг сурункали муаммолари ечилмасдан қолмоқда, январда клубнинг собиқ хазиначиси Карлес Тускетс бошчилигидаги вақтинчалик маъмурияти Эрик Гарсияни сотиб олиш учун арзимаган 5 миллион еврони аяди. Энди бу испаниялик қадрдон клубига ёзда, «Манчестер Сити» билан шартномаси муддати якунига етганидан кейин эркин агент сифатида келади, жамоанинг ҳозирги ҳимоячилари эса идеал ўйинда ҳам жамоа учун қандайдир муаммо ўйлаб топишга ярашмоқда, холос.

Парижда Лангле ўта бесўнақайлиги туфайли пенальтига сабабчи бўлди - у тўп йўналишини кузата туриб, Икардининг оёғини босиб олди, Мбаппега қарши ҳеч нарса қила олмаган ва иккинчи марта сариқ карточка олишига бир бахя қолган Мингеса эса биринчи бўлимдаёқ майдондан олинди. Бундай рақибларга қарши ўйинда парижлик вундеркинд Мессининг ЕЧЛдаги рекордларидан яна бирини янгилади - у асосий еврокубокдаги 25-голини ундан эртароқ урди - 22 ёшу 80 кунлигида. 30 ёшни қоралаётган Гризманнда ҳам шунча гол бор. Аммо, афтидан, Мбаппени ҳам бошқа бир ёш футболчи қувиб ўтадиган кўринади - шитоб билан таъқиб қилиб келаётган 20 ёшли Ҳоланд аллақачон 20талик довонни забт этиб улгурди.

Алалоқибат «Барса»нинг умидларини Мбаппе эмас, шу куни фантастик ўйин кўрсатган Навас кўмди. Афтидан, «Реал»нинг собиқ дарвозабони учун собиқ азалий рақибга қарши ўйинда ютқазмаслик муҳим эди. Коста-рикалик дарвозабоннинг сэйвлари бўлмаганида, ўйиннинг иккинчи бўлими жуда шиддатли кечган бўларди. У ўйин давомида 9та сейв амалга оширди.

Кўк-анорранглилар сўнгги 14 йил ичида илк марта чорак финалга чиқа олмаган бўлишса-да, ўтган мавсумда «Бавария»дан қабул қилиб олинган 2:8 ҳисобидаги мағлубиятдан фарқли равишда, бу сафар турнир билан бошни баланд кўтарган ҳолда хайрлашишди. «ПСЖ» Каталония пойтахтидан жуда қулай ҳисоб билан қайтган ва жавоб ўйинида ортиқча куч ишлатмасдан ўйнади, деб ҳисобласак ҳам.

Буёғига нима бўлади? Янги президент Жоан Лапорта ҳаммаси яхши бўлишига ваъда бермоқда. Кўп эҳтимолки, Месси билан давом этилади, у ўтган кун жуда ёмон ўйин кўрсатган Криштиану Роналдудан фарқли равишда чарчаган фахрийдек кўринмади. Лекин бу асосий хулосани бекор қила олмайди: 2005 йилдан буён илк бор бу икки юлдуз ЕЧЛ чорак финалида ўйнамайди. Лекин у ерда Мбаппе ва Ҳоланд бўлади.