«Сити»да яна мағлубият, «Барса»да яна теннисча ҳисоб
|12:372 65610 мин
«МЮ» «Челси» майдонида озчилик бўлиб қолди ва ютқазди – жамоа 9 ўйиндирки ғалаба қозона олмаяпти; «Сити»нинг қаторасига иккинчи ўйиндаги мағлубияти «Арсенал»га қўл келиши мумкин – амалдаги чемпионлар бугун – «Ливерпул»га қарши ўйинда ютқазмаса, биринчи ўринга чиқиб олади. «Барса» эса кетма-кет мағлубиятлардан кейин «қутурди».
Ўйиннинг биринчи бўлимида «қизил иблислар» тенгма-тенг кураш олиб боришди, бир неча хавфли вазиятларга эга бўлишди, голга мезбонлардан кўра яқинроқ бўлишди. «Челси» ҳимояси тез-тез ҳимояда хатоларга йўл қўйди, 32-дақиқада Амад Диалло Фофананинг хатосидан кейин дарвозабон билан яккама-якка вазиятга чиқиб борди, аммо Пендерс ишончли ҳаракат қилди.
Бироз ўтиб бурчак зарбасидан кейин меҳмонлар дарвозани ишғол этишди ва голни узоқ нишонлашди. Аммо вазиятга VAR аралашиб, ҳужумда фол қайд этди ва Кунянинг голи бекор қилинди.
Бўлим охирида Диалло яна бир бор Фофанани алдаб ўтиб, яккама-якка вазиятга чиқиб кетди, аммо бу сафар ҳам аниқ зарба бера олмади.
Иккинчи бўлим бошида эса Роджерс майдон марказидан рейд уюштириб, ҳеч қандай қаршиликсиз рақиб жарима майдонига кириб борди ва ҳужумни ўзи якунлади.
Бу гол меҳмонлар кайфиятига жиддий таъсир кўрсатди ва мухлисларга биринчи бўлимдаги ўйинини кўрсатиб бера олмади.
Кўп ўтмай лондонликлар бурчак зарбаси ижро этганида жарима майдони ичида Мартинес тирсаги билан рақибга зарба берди, видеотакрордан кейин меҳмонлар дарвозасига пеналти белгиланди, қоидабузар эса майдондан четлатилди. Палмер 11 метрдан аниқ зарба йўллаб, ўйин тақдирини ҳал қилди.
Мавзуга оид
«Челси» қолган вақт мобайнида ғалабани сақлаб қолди ва яна турнир жадвалида тўртинчи ўринга кўтарилиб олди. «МЮ» эса лигада еттинчи ўйиндирки ғалаба нималигини билмаяпти (барча турнирлар доирасидаги серия 9 ўйинга етди) ва турнир жадвалида 17-ўринда қолмоқда.
Чоршанба куни бу жамоалар Лига кубоги нимчорак финали доирасида «Этиҳад»да учрашган ва ўйиннинг асосий вақтида 2:2 ҳисоби қайд этилиб, ўйиндан кейинги пеналтилар сериясида «Манчестер Сити»нинг қўли баланд келганди. Уч кун ўтиб бу жамоалар бошқа турнирда ва бошқа таркибларда ўйнашди. Бу сафар ҳам «чайка»лар ҳисобни очишди: 11-дақиқада тўп ўнг қанотдан олис устун томон етказилди, у ерда Нунеш тўп йўлини тўса олмади ва Де Кейпер бир тегинишда тўпни марказга қайтарди. Кубок ўйинида «Брайтон» сафида пеналтидан гол уролмаган Айари эса осонлик билан дарвозани ишғол этди.
Ўйиннинг қолган вақти мобайнида «шаҳарликлар» тўлиқ устунликка эришишди. Мезбонлар жами 21 марта зарба берди, шундан 6 таси дарвоза соҳасига тўғри борди, «Сити» футболчилари рақиб жарима майдони ичида 67 бор тўп билан муомила қилди, 1,92 xg имкониятга эга бўлишди, лекин бирорта ҳам гол ура олишмади. Ҳатто ўзбекистонлик ҳимоячи Абдуқодир Ҳусанов ҳам ҳужумга қўшилиб, икки марта рақиб жарима майдони ичида хавфли вазиятга эга бўлди, унинг ўткир бурчакдан йўллаган кучли зарбасини дарвозабон Вербрюгген қайтариб қолди, қайтган тўпга О'Райли бош билан зарба йўллади, аммо тўп устун ёнгинасидан ўтиб кетди.
Якунда Энцо Мареска шогирдлари лигада қаторасига иккинчи бор мағлуб бўлишди, аммо статистика нуқтайи назаридан бу натижа – сюрприз эмас. Гап шундаки, «Брайтон» «Сити»га АПЛ доирасида сўнгги бешта ўйинда ютқазмаяпти (3 ғалаба, 2 дуранг).
Мавсумни қаторасига 7 ўйинда ғалаба қозониш орқали бошлаган «шаҳарликлар» энди тур якунларига кўра турнир жадвали пешқадамлигини бой бериши мумкин. Бугун «Арсенал» «Ливерпул» майдонида ютқазмаса, очколар сони эвазига биринчи ўринга чиқиб олади.
Ўйиндан олдин ҳам яққол фаворит ҳисобланган «Тоттенҳэм» 13-дақиқадаёқ сон жиҳатдан устунликка эга бўлиб олди: меҳмонлар ҳужумчиси Матета майдон марказида аҳмоқона подкат ишлатди ва майдонни анча эрта тарк этишга мажбур бўлди. Бўлим ўрталарида эса бурчак зарбасидан кейин Грэй бош билан ҳисобни очди. Иккинчи бўлим ўрталарида ван Ҳекке «шпорлар»нинг устунлигини мустаҳкамлади.
«Пэлас» қандайдир вазият яратиш тугул, рақиб томонга умуман ўта олмади. «Тоттенҳэм» ўйиннинг 79 фоиз вақтида тўпга эгалик қилди, 761 та пас берди (рақибда 212 та), 28 та зарба йўллади (рақибда 2 та), 19 марта бурчак зарбаси ижро этди (рақибда бирорта йўқ) ва фақат 2 гол билан кифояланди.
Роберто Де Дзерби жамоаси қаторасига учинчи ғалабани нишонлади ва турнир жадвалида саккизинчи ўринга кўтарилиб олди.
Испания: Симеонеда рекордга бир қадам қолди, Фликда – юбилей
«Атлетико» «Леванте» майдонида тўпни мезбонларга деярли бермади ва биринчи бўлимнинг иккинчи ярмида ҳисобда олдинга чиқиб олди. Алекс Баэна тўпга бир тегинишда Грималдони дарвозабон билан яккама-якка вазиятга чиқариб юборди. У энди гол+пас бўйича 4+2 кўрсаткичини қайд этган ҳолда чемпионатнинг энг сермаҳсул ҳимоячиси бўлиб турибди.
Танаффусдан кейин ҳам ташаббус «матрасчилар»да қолди ва кетма-кет вазиятларга эга бўлишди: дарвоза устуни ва тўсини пойланди, офсайддан гол урилди, ниҳоят ҳисобдаги фарқ оширилди. Бу сафар Баэна Жулиано Симеонени голли вазиятга чиқариб юборди.
Бу вазиятдан фойдаланган кичик Симеоне отасига клуб рекордини такрорлашда ёрдам берди. Энди у ҳам худди Луис Арагонес каби мадридликлар бошқарувида ла лига ўйинларидаги 344 ғалабага эга. Шу билан бирга, аргентиналик мутахассис бу натижага анча камроқ ўйинда эришган (756 га қарши 565 ўйин).
Ўтган ҳафтада класикода ютқазган «Барселона» бор аламини «Алавес»дан олишга қарор қилди. Ўйин бошидаёқ Фермин Лопес Рафиняни бўш дарвоза қаршисига чиқариб юборди, бўлим ўрталарида ўзи гол урди, бўлим охирида яна бразилиялик вингерга ассист амалга оширди.
«Реал»га қарши ўйинда йўқолиб қолган Ямал эса шу куни дубл муаллифига айланди. Унинг ўрнига захирадан тушган Гордон ҳам ўз номини таблога ёздириб қўйди – 6:0.
Рақиб шундан кейингина битта жавоб голини уришга эришди ва ҳисоб теннисча кўриниш олди – 6:1.
Ҳанси Флик «Барса» бошқарувидаги юбилей 100-ғалабасини шу тарзда нишонлади.
Унинг бошқарувидаги жамоа нисбатан кучлироқ қарши жамоалар қаршисида ожиз қолмоқда (каталонияликлар класикодан олдин ЕЧЛда «ПСЖ»га ҳам 2:4 ҳисобида ютқазганди). Лекин ички чемпионатдаги бошқа нисбатан осон рақиблар шунчаки янчиб ташланмоқда.
Энди кўк-анорранглиларни сешанба оқшомида «Камп Ноу»да меҳмон бўладиган Унаи Эмери бошчилигидаги «Астон Вилла»га қарши яна бир синов кутмоқда, халқаро танаффусга йўл олиш олдидан эса Мадридда «Атлетико»га қарши жанг бўлади.
«Бетис» эса кучли тўртликдаги ўрнини мустаҳкамлашда давом этмоқда, лиганинг сўнгги ўриндаги жамоасига қарши ўйин натижаси эса ўйинга мос чиқмади. Мануэл Пеллегрини шогирдлари ўйинни тўлиқ назорат қилишди ва биринчи бўлимдаёқ икки гол уриб, масалани ҳал қилишди. Аввалига Иско жарима зарбасидан узатган пасдан фойдаланиб, Бартра ҳисобни очди. Бўлимга қўшиб берилган дақиқаларда эса Пабло Форналс иккинчи голни урди. «Малага» иккинчи бўлимда битта жавоб голини уришга эришди, аммо мезбонлар рақибга бошқа имкон қолдиришмади.
