Тошкентда ИИББ ходими ва ички ишлар бўлимига келган фуқаролар ўртасида келишмовчилик келиб чиқди

Интернет тармоғида Тошкент шаҳар ИИББ ходими ва ички ишлар бўлимига келган фуқаро ўртасидаги келишмовчилик видеоси тарқалди. Пойтахт ИИББ ҳолат бўйича маълумот тақдим этди.

Қайд этилишича, Учтепа тумани ИИО ФМБ 7-сон ички ишлар бўлимига пойтахтда яшовчи фуқаро Ч.Т.дан мурожаат келиб тушган. Мурожаатчи ўз аризасида 41 ёшли Т.Х.нинг ундан 6 000 000 сўм қарзи борлигини маълум қилган.

2021 йил 5 июнь куни Учтепа тумани ИИО ФМБ профилактика катта инспектори подполковник М.Фозилов Т.Х.ни ички ишлар бўлимига келиб тушган мурожаат билан танишиб, мазкур факт бўйича тушунтириш хати ёзиши учун таклиф қилган. 

Ходимнинг иш жойига Т.Х. билан бирга унинг мазкур ишга алоқадор бўлмаган икки нафар таниши (муқаддам икки марта судланган 43 ёшли Ф.Ю. ва 34 ёшли С.Т.) ҳам кирмоқчи бўлишган. 

“Хонани тарк этиш тўғрисидаги илтимосга жавобан фуқаролар қўпол муомалада бўлиб, ҳолатни видеога туширишни бошлашган ва бу билан ходимнинг иш фаолиятига тўсқинлик қилишган. Фуқаролар ички ишлар бўлимидан чиқарилиши жараёни юқоридаги видеога тушиб қолган”, дейилади маълумотда. 

Келишмовчилик давомида Т.Х. тушунтириш хати ёзишга тайёрлигини билдириб, ўзи ҳам дўстларини тинчлантирмоқчи бўлгани айтилади.