2021 йилнинг ўтган 6 ойида болалар билан боғлиқ 542та ЙТҲ содир этилиб, 104 нафар вояга етмаган бола ҳалок бўлди. Бу ҳақда Сенат эълон қилган маълумотда айтилди.
![](https://storage.kun.uz/source/7/Bjr8osTuXMPjzcx1F4Yy6cm2YDbN8lev.jpg)
Билдирилишича, 28 июль куни Олий Мажлис юқори палатасининг ўн еттинчи ялпи мажлиси олдидан Сенатнинг Мудофаа ва хавфсизлик масалалари қўмитасининг мажлиси бўлиб ўтди.
Сенат хабарига кўра, мажлисда республикада содир бўлаётган йўл-транспорт ҳодисалари билан боғлиқ масалага алоҳида эътибор қаратилди. Хусусан, автомобиль йўлларида йўловчилар хавфсизлигини таъминлаш юзасидан таъсирчан назорат тўлиқ ва самарали ўрнатилмаганлиги сабабли 2021 йилнинг 6 ойи давомида жами 3,5 миллионга яқин, 2020 йилга нисбатан 40,8 фоизга кўп йўл ҳаракати қоидабузарлиги қайд этилган.
Қайд этилишича, оқибатда 3 754та йўл-транспорт ҳодисаси содир этилиб, уларда 3 170 нафар фуқаро жароҳатланган ва 954 нафар фуқаро ҳалок бўлган.
2021 йилнинг ўтган 6 ойида болалар билан боғлиқ 542та ЙТҲ содир этилиб, уларда 458 нафар бола жароҳатлангани ва 104 нафар вояга етмаган бола ҳалок бўлгани танқидий муҳокамаларга сабаб бўлди.