“Битта нарсани нисбат қилиб олиш мумкин. Жамиятдаги энг оғир ва масъулиятли касб эгалари бу – ўқитувчилар. Профилактика инспекторлари ўқитувчидан бир ярим баробар кўп ойлик олади. Иккинчидан, вазиримизнинг буйруқларига асосан, инспекторлар қўл телефонларидан бепул фойдаланишади, яъни мобил алоқа харажатлари қоплаб берилади. Уларга маҳалла билан бевосита мулоқотда бўлиб туриш учун бепул интернет пакетлар ажратилади.
Бундан ташқари, профилактика инспекторларига кам фоизли автокредитлар олиб берилмоқда. Ҳозирги кунда ходимларимизнинг 70 фоизи шахсий автомобилига эга. Штатга янги ходимлар қабул қилинишидан олдин бу кўрсаткич 100 фоиз эди. Аста-секин яна барча ходимларни автотранспорт билан таъминлашга ҳаракат қиляпмиз. Вазирлар Маҳкамасининг 2019 йил 1 мартдаги 207-сонли қарори билан инспекторларнинг транспорт харажатларини қоплаш учун вазирлик томонидан ҳар ойда базавий ҳисоблаш миқдорининг 1,5 баравари миқдорида қўшимча устама ҳақ тўлаб берилади.
Шунингдек, улар давлат томонидан ажратилган хизмат уйларида давлат байроғи остида яшашмоқда. Давлат байроғи остида яшаш элчиларимизга хос, президентимиз профилактика инспекторларига ҳам ана шундай ҳуқуқни бериб, уларнинг мақомини элчиларникига тенглаштирдилар.
Бу билан профилактика инспекторларига берилаётган имтиёзларни миннат қилмоқчи эмасман. Лекин жамиятга энг керакли бўлган ўқитувчиларга қиёслаганда уларнинг моддий таъминоти яхшироқ эканини таъкидламоқчиман”, деди Бахтиёр Бердиалиев.
ИИВ мулозимининг таъкидлашича, илгари бир нечта маҳалла учун битта профилактика инспектори ажратилган бўлса, бугунги кунда республика бўйича 9259 нафар, яъни ҳар бир маҳаллада биттадан профилактика инспектори фаолият юритмоқда.
“Илгари битта профилактика инспектори 7 та маҳаллага масъул бўлган. Қаерга боришини билмаган. Машинаси ҳам бўлмаган. Ҳеч ким унинг хизмат турар жойи билан қизиқмаган. Ҳар куни 20, ҳатто 50 километр йўл юриб хизматга қатнаган. Бугунги кунда эса 9259 та маҳалланинг ҳар бирига биттадан профилактика инспектори қўйилган. Олдинги шароит билан солиштирганда, ҳозиргисининг ўртасида катта фарқ бор. Ҳар бир маҳаллада битта инспектор ишлаши учун бюджетдан катта маблағлар сарфланмоқда.
