Афғонистоннинг Kam Air авиакомпанияси 14 декабрдан бошлаб Кобул ва Тошкент ўртасида авиақатновни тиклайди, деб хабар бермоқда «Спутник».
«Бизда яхши янгилик бор – 14 декабрдан парвозларни тиклаймиз», — дейилади авиакомпаниянинг Ўзбекистондаги ваколатхонаси хабарида.
Kam Air вакилининг таъкидлашича, дастлаб йўловчи рейслари ҳафтасига икки марта - сешанба ва шанба кунлари амалга оширилади.
Ноябрь ойи охирида Афғонистоннинг Bakhtar агентлиги Kam Air раҳбари Замари Қамгар баёнотига таяниб, Кобул ва Тошкент ўртасидаги ҳаво қатнови декабрь бошида тикланиши мумкинлигини хабар қилганди.
Қамгарнинг айтишича, ҳаво транзити муаммоси ҳал қилинган.
Бироқ ўшанда Ўзбекистон томони Кобул ва Тошкент ўртасида мунтазам авиақатновлар қайта тикланиши ҳақида ҳеч нарса билмаслигини билдирган.
