Россияда UzAuto Motors автомобилларини олиб кетаётган автотрейлерда ёнғин содир бўлди (видео)

Ижтимоий тармоқларда Москвада Chevrolet автомобилларини олиб кетаётган автотрейлернинг ёнаётгани акс этган видео тарқалди.

UzAuto Motors компанияси мазкур ҳолатга муносабат билдириб, ёнғин оқибатида 3 та автомобил зарар кўрганини маълум қилди.

“Дастлабки маълумотларга кўра, ёнғин Россия автомобил ташувчисига тегишли автотрейлернинг салонида маҳаллий дилерлар ўртасида автомобил ташишни амалга ошириш вақтида содир бўлган. Автотрейлер кабинасидаги аланга автомобиллар бўлган трейлерга тарқалган. Натижада 8 та автомобилдан 3 таси зарар кўрган. Ҳодисадан автотрейлер ҳайдовчи жабрланмаган”, дейилади компания хабарида.

Қайд этилишича, воқеа Москва вилояти ҳудудида автомобилларни мижозга олиб ўтиш вақтида юз берган. Барча ташилган автомобиллар суғурталанган бўлиб, улар россиялик мижозга тегишли бўлган.

Ҳозирда зарурий ёнғин-техник экспертизаси ўтказилиб, ёнғиннинг келиб чиқиш сабаблари ўрганилмоқда.